கழுகுமலை கழுகாசலமூர்த்தி கோவிலில் தைப்பூசத் திருவிழா கொடியேற்றத்துடன் தொடங்கியது

கழுகுமலை,

கழுகுமலை கழுகாசலமூர்த்தி கோவில் தைப்பூச திருவிழா கொடியேற்றம் நேற்று முன்தினம் இரவு நடைபெற்றது. அதனைத் தொடர்ந்து 10 நாட்கள் திருவிழா நடைபெறும். முதல் திருநாளான இரவு 8 மணிக்கு சுவாமி வள்ளி தெய்வானையுடன் பூ சப்பரத்தில் வீதி உலா, 2-ம் திருநாள் பூத வாகனத்திலும், 3-ம் திருநாள் அன்ன வாகனத்திலும், 4-ம் திருநாள் வெள்ளி யானை வாகனத்திலும், 5-ம் திருநாள் வெள்ளி மயில் வாகனத்திலும், 6-ம் திருநாள் காலை வாகனத்தில் சோமஸ்கந்தர் மற்றும் ரிஷப வாகனத்தில் அம்பாளும், 7-ம் திருநாள் காலை சண்முகருக்கு சிறப்பு அர்ச்சனையும் நடைபெறும்.

அதனை தொடர்ந்து மாலையில் புஷ்பாஞ்சலி, இரவு 8 மணிக்கு சுவாமி வள்ளி தெய்வானையுடன் வெள்ளி சப்பரத்தில் சிவப்பு மலர் சூடி சிவன் அம்சமாகவும், நள்ளிரவு 12 மணிக்கு வெள்ளை மலர் சூடி பிரம்மன் அம்சமாகவும், மறுநாள் அதிகாலை 5 மணிக்கு பச்சை மலர்சூடி திருமால் அம்சமாகவும் கிரிவலப்பாதை வழியாக வீதி உலா நடைபெறும். 8-ம் திருநாள் இரவு சுவாமி கைலாச பர்வத வாகனத்திலும், 9-ம் திருநாளன்று மயில் வாகனத்திலும் வீதி உலா நடைபெறும்.

தேரோட்டம்

விழாவின் சிகர நிகழ்ச்சியாக 10-ம் திருநாளான 28-ந் தேதி காலை 7 மணிக்கு சுவாமி வள்ளி தெய்வானையுடன் எழுந்தருளல் நடைபெறும். அதனை தொடர்ந்து காலை 9 மணிக்கு கோ ரதத்தில் விநாயக பெருமானும், சட்ட ரதத்தில் கழுகாசலமூர்த்தி வள்ளி தெய்வானையுடன் ரத வீதி வழியாக தேரோட்டமும் நடக்கிறது. இரவு 8 மணிக்கு இந்திர வாகனத்தில் சுவாமி வள்ளி-தெய்வானையுடன் வீதி உலா வந்து பக்தர்களுக்கு காட்சி அளிக்கிறார். விழா ஏற்பாடுகளை கோவில் நிர்வாக அதிகாரி கார்த்தீஸ்வரன் மற்றும் கோவில் ஊழியர்கள் செய்து வருகின்றனர்.