திருப்பூர், ஜூன்.20-
திருப்பூர் மாவட்டத்தில் கொரோனா தடுப்பூசி போடும் பணி தொடர்ந்து நடந்து வருகிறது. 45 வயதுக்கு மேற்பட்டவர்கள் திருப்பூர் மாவட்டத்தில் 8 லட்சத்து 33 ஆயிரத்து 84 பேரும், 18 வயதுக்கு மேல் 45 வயதுக்கு உட்பட்டவர்கள் 13 லட்சத்து 87 ஆயிரத்து 436 பேரும் என மொத்தம் 22 லட்சத்து 20 ஆயிரத்து 570 பேர் உள்ளனர்.
இவர்களில் கோவிஷீல்டு தடுப்பூசியை 2 லட்சத்து 42 ஆயிரத்து 323 பேர் முதல் தவணை செலுத்தி உள்ளனர். இரண்டாவது தவணையாக 36 ஆயிரத்து 838 பேர் தடுப்பூசி போட்டுள்ளனர்.
அதுபோல் கோவாக்சின் தடுப்பூசியை முதல் தவணையாக 39 ஆயிரத்து 983 பேரும், 2-வது தவணையாக 11 ஆயிரத்து 454 பேரும் செலுத்தியுள்ளனர். மொத்தத்தில் மாவட்டத்தில் கடந்த 17-ந் தேதி வரை 3 லட்சத்து 30 ஆயிரத்து 598 பேர் கொரோனா தடுப்பூசி செலுத்தி இருக்கிறார்கள். இது வரை 14.8 சதவீதம் பேர் தடுப்பூசி போட்டுள்ளனர்
இந்தநிலையில் திருப்பூர் மாநகர பகுதியில் நேற்று மாற்றுத்திறனாளிகள் மற்றும் பாலூட்டும் தாய்மார்களுக்கு கொரோனா தடுப்பூசி முகாம் நடந்தது.