கரூர் மாவட்டத்தில் 202 வார்டுகளை கைப்பற்றிய தி.மு.க.

தமிழகத்தில் நகர்ப்புற உள்ளாட்சி தேர்தல் அறிவிக்கப்பட்டது. இதில் கரூர் மாவட்டத்தில் கரூர் மாநகராட்சி 48 வார்டுகள், குளித்தலை, பள்ளப்பட்டி, புகழூர் ஆகிய 3 நகராட்சிகளில் 75 வார்டுகள், அரவக்குறிச்சி, புலியூர், கிருஷ்ணராயபுரம், மருதூர், நங்கவரம், பழைய ஜெயங்கொண்ட சோழபுரம், புஞ்சை தோட்டக்குறிச்சி, உப்பிடமங்கலம் ஆகிய 8 பேரூராட்சிகளில் 123 வார்டுகள் என மொத்தம் 246 வார்டுகளுக்கு தேர்தல் அறிவிக்கப்பட்டது. இதில் 5 வார்டுகளில் வேட்பாளர்கள் போட்டியின்றி தேர்வாகி இருந்தனர். மீதமுள்ள 241 வார்டுகளுக்கு கடந்த 19-ந்தேதி தேர்தல் நடைபெற்றது. நேற்றுமுன்தினம் வாக்கு எண்ணிக்கை நடைபெற்று, இறுதி முடிவுகள் அறிவிக்கப்பட்டன.

இதில் கரூர் மாநகராட்சி, குளித்தலை, புகழூர், பள்ளப்பட்டி ஆகிய 3 நகராட்சிகள், உப்பிடமங்கலம், அரவக்குறிச்சி, புலியூர், நங்கவரம், பழைய ஜெயங்கொண்ட சோழபுரம், மருதூர், புஞ்சை தோட்டக்குறிச்சி, கிருஷ்ணராயபுரம் ஆகிய 8 பேரூராட்சிகளையும் தி.மு.க. கைப்பற்றியது. இதில் கரூர் மாவட்டத்தில் மொத்தம் உள்ள 246 வார்டுகளில் 202 வார்டுகளை தி.மு.க. கைப்பற்றி உள்ளது.

கரூர் மாநகராட்சியில் 42 வார்டுகள், 3 நகராட்சிகளில் 59 வார்டுகள், 8 பேரூராட்சிகளில் 101 வார்டுகள் என மொத்தம் 202 வார்டுகளை தி.மு.க. கைப்பற்றி உள்ளது.

அ.தி.மு.க. 12 வார்டுகளில் வெற்றி பெற்றுள்ளது. இதில் கரூர் மாநகராட்சியில் 2 வார்டுகள், 3 நகராட்சிகளில் 2 வார்டுகள், 8 பேரூராட்சிகளில் 8 வார்டுகள் என மொத்தம் 12 வார்டுகளில் வெற்றிபெற்று உள்ளது. பா.ஜனதா 3 வார்டுகளிலும், காங்கிரஸ் 5 வார்டுகளிலும், ம.தி.மு.க. ஒரு வார்டிலும், இந்திய கம்யூனிஸ்டு கட்சி ஒரு வார்டிலும், மார்க்சிஸ்ட் கம்யூனிஸ்டு கட்சி 4 வார்டுகளிலும், இந்தியன் முஸ்லீம் லீக் ஒரு வார்டிலும், எஸ்.டி.பி.ஐ. ஒரு வார்டிலும், சுயேச்சைகள் 16 வார்டுகளிலும் வெற்றி பெற்று உள்ளனர்.