கோபி அருகே கோவிலில் நகை திருடியவர் கைது

கோபி அருகே உள்ள பொலவக்காளிபாளையம் மாரியம்மன் கோவிலில் கடந்த 14-ந் தேதி பூட்டை உடைத்து மர்ம நபர் ஒருவர் 2 பவுன் நகையை திருடிச்சென்று விட்டார். இதுகுறித்து கோபி போலீசார் வழக்குப்பதிவு செய்து மர்ம நபரை தேடி வந்தார்கள். இந்த நிலையில் ஒத்த குதிரையில் கோபி போலீசார் வாகன சோதனையில் ஈடுபட்டிருந்தனர். அப்போது அந்த வழியாக சந்தேகத்துக்கு இடமான வகையில் வந்த ஒருவரை பிடித்து விசாரித்தார்கள். அவர் முன்னுக்கு பின் முரணாக பதில் கூறியதால் அவரை கோபி போலீஸ் நிலையத்துக்கு அழைத்து சென்று விசாரித்தார்கள். அதில் அவர் கோபி பாலபாளையத்தையைச் சேர்ந்த சண்முகம் (வயது 42) என்பதும், அவர்தான் பொலவக்காளிபாளையம் மாரியம்மன் கோவிலில் 2 பவுன் நகையை திருடியது என்பதும் தெரியவந்தது. இதைத்தொடர்ந்து போலீசார் சண்முகத்தை கைது செய்து, அவரிடம் இருந்த நகையை பறிமுதல் செய்தார்கள்.