தீக்காயம் அடைந்த தொழிலாளி சாவு

தாயில்பட்டி, 

சிவகாசியை சேர்ந்த சண்முகையா என்பவருக்கு சொந்தமான ரோல் கேப் வெடி தயாரிக்கும் பட்டாசு ஆலை தாயில்பட்டி ஊராட்சி மண்குண்டாம்பட்டியில் உள்ளது. இங்கு பாம்பு மாத்திரை மருந்து செலுத்தும் பணி செய்து கொண்டிருந்த ஆலமரத்துபட்டியை சேர்ந்த ராஜா என்பவர் திடீரென ஏற்பட்ட தீ விபத்தில் படுகாயம் அடைந்தார். இவரை சிகிச்சைக்காக மதுரை அரசு மருத்துவமனையில் சேர்த்தனர். இந்தநிலையில் அவர் சிகிச்சை பலனின்றி இறந்தார். இவருக்கு தனலட்சுமி என்ற மனைவியும், 3 பெண் குழந்தைகளும் உள்ளனர்.  இதுகுறித்து வெம்பக்கோட்டை போலீசார் வழக்குப்பதிவு செய்து பட்டாசு ஆலை போர் மேன் செங்கமலப்பட்டியை சேர்ந்த ஒயிட் (வயது 60) என்பவரை கைது செய்தனர். பட்டாசு ஆலை உரிமையாளர் சண்முகையாவை தேடிவருகின்றனர்.