முருகன் சிலையை வைக்க அனுமதிக்க கோரி பொதுமக்கள் முற்றுகை போராட்டம்

தலைவாசல்:-

கோவிந்தம்பாளையம் ஊராட்சியில் முருகன் சிலையை வைக்க அனுமதிக்க கோரி பொதுமக்கள் வருவாய் ஆய்வாளர் அலுவலகத்தை முற்றுகையிட்டு போராட்டம் நடத்தினார்கள்.

தலைவாசல் அருகே உள்ள கோவிந்தம்பாளையம் ஊராட்சியில் கடந்த சில நாட்களுக்கு பொதுமக்கள் முருகன் சிலையை வைக்க முயன்றனர். இதற்கு உரிய அனுமதி பெறவில்லை. இதையறிந்த தலைவாசல் வருவாய் ஆய்வாளர் கனிமொழி சிலையை கைப்பற்றி கோவிந்தம்பாளையம் ஊராட்சி அலுவலகத்தில் வைத்து பூட்டி வைத்தார்.

இந்த நிலையில் நேற்று காலை 10 மணிக்கு கோவிந்தபாளையம் பகுதியை சேர்ந்த ஏராளமான பொதுமக்கள், முருகன் சிலை அமைக்க அனுமதி வழங்க கோரி தலைவாசல் வருவாய் ஆய்வாளர் அலுவலகத்தை முற்றுகையிட்டனர். இதனால் அங்கு பரபரப்பு ஏற்பட்டது. இது குறித்து தலைவாசல் தாசில்தார்சுமதிக்கு தகவல் தெரிவிக்கவிட்டது.

இதைத்தொடர்ந்து தாசில்தார் சுமதி, தலைவாசல் போலீஸ் இன்ஸ்பெக்டர் ரவி மற்றும் அதிகாரிகள், போலீசார் விரைந்து வந்தனர். அவர்கள் முற்றுகையில் ஈடுபட்ட பொதுமக்களிடம் பேச்சுவார்த்தை நடத்தினர். இந்த பேச்சுவார்த்தையில், தலைவாசல் வருவாய் ஆய்வாளர் கனிமொழி, கிராம நிர்வாக அலுவலர் குமார், கால்நடை துறை உதவி டாக்டர்கள் லட்சுமணன் சக்திவேல் மற்றும் கோவிந்தம் பாளையம் ஊர் முக்கிய பிரமுகர்கள் சின்னசாமி, வீரமுத்து, கலியமூர்த்தி, முருகேசன், பொதுமக்கள் கலந்து கொண்டனர்.

முருகன் சிலையை வைக்க முயன்ற இடம் மேய்ச்சலுக்கான புறம்போக்கு நிலம். அது கால்நடை துறைக்கு சொந்தமான இடம். எனவே முறையான அனுமதி வழங்கிய பின்னரே அங்கே சிலை அமைக்க அனுமதி வழங்கப்படும். சாமி சிலையை வைப்பதற்கு முன்பாகவே வருவாய், காவல், கால்நடை துறை ஆகிய துறைகளில் அனுமதி பெற்றிருக்க வேண்டும். எனவே தற்போது இங்கு சிலையை வைக்க அனுமதி கிடையாது. முறையான அனுமதி பெற்றபின்னர் சிலையை வைத்துக் கொள்ளலாம் என்று தாசில்தார் சுமதி கூறினார். இதைத்தொடர்ந்து பொதுமக்கள் கலைந்துசென்றனர். 

இதனிடையே கோவிந்தம்பாளையம் ஊராட்சி அலுவலகத்தில் வைத்திருந்த முருகன் சிலை பொதுமக்களிடம் ஒப்படைக்கப்பட்டது. ஆனால் பொதுமக்கள் முருகன் சிலையை வைக்க இடம் ஒதுக்கினால் மட்டுமே சிலையை எடுத்து செல்வோம் எனக்கூறி, சிலையை எடுத்து செல்லாமல் கோவிந்தம்பாளையம் ஊராட்சி அலுவலகம் எதிரில் வைத்து விட்டு சென்றனர். 

இதைத்தொடர்ந்து அந்த சிலையை போலீசார், இ-சேவை மையத்தில் வைத்துள்ளனர். மேலும் அங்கு போலீஸ் பாதுகாப்பு போடப்பட்டுள்ளது. இந்த சம்பவம் அந்த பகுதியில் பரபரப்பை ஏற்படுத்தியது.