தர்மபுரியில் ஓய்வு பெற்ற தனியார் நிறுவன அதிகாரி வங்கி கணக்கில் ரூ6¼ லட்சம் மோசடி சைபர் கிரைம் போலீசார் விசாரணை

தர்மபுரி:

தர்மபுரியில் ஓய்வு பெற்ற தனியார் நிறுவன அதிகாரி வங்கி கணக்கில் இருந்து ரூ.6¼ லட்சம் மோசடியில் ஈடுபட்ட மர்ம நபர்கள் குறித்து சைபர் கிரைம் போலீசார் விசாரணை நடத்தி வருகிறார்கள்.

 ஓய்வு பெற்ற அதிகாரி

தர்மபுரி இந்திரா நகரை சேர்ந்தவர் நடேசன் (வயது 81). ஓய்வு பெற்ற தனியார் நிறுவன அதிகாரி. இவருக்கு தர்மபுரியில் உள்ள ஒரு தனியார் வங்கி கிளையில் சேமிப்பு கணக்கு உள்ளது. இணையதள வசதியுடன் கூடிய வங்கி சேவையை இவர் பயன்படுத்தி வந்தார். அந்த சேவையை புதுப்பித்து கொள்வதற்காக செல்போன் மூலம் பதிவு செய்ய முயன்றார்.

அப்போது தொழில்நுட்ப பிரச்சினை ஏற்பட்டதாக கூறப்படுகிறது. இதனால் வாடிக்கையாளர் சேவை மையத்தை அவர் தொடர்பு கொண்டார். அப்போது ஒரு செல்போன் எண்ணில் இருந்து அவருக்கு குறுந்தகவல் வந்தது. அதுதொடர்பான லிங்க்கை அழுத்தினார். அப்போது அவருடைய வங்கி கணக்கில் இருந்து ரூ.6 லட்சத்து 34 ஆயிரத்து 999 மாயமானது.

போலியாக வாடிக்கையாளர் சேவை மைய லிங்க்கை மர்ம நபர்கள் அனுப்பி நூதன முறையில் பணம் மோசடியில் ஈடுபட்டு இருப்பது தெரியவந்தது. இதனால் அதிர்ச்சி அடைந்த நடேசன், இதுபற்றி தர்மபுரி சைபர் கிரைம் போலீசாரிடம் புகார் அளித்தார். அதன்பேரில் போலீசார் வழக்குப்பதிவு செய்தனர். நடேசனின் வங்கி கணக்கில் இருந்து பணத்தை எடுத்து மோசடியில் ஈடுபட்ட மர்ம நபர்கள் குறித்து போலீசார் தீவிர விசாரணை நடத்தி வருகிறார்கள்.