திம்பம் அருகே காரப்பள்ளம் சோதனை சாவடியில் 5 கி.மீ. தூரத்துக்கு அணிவகுத்து நின்ற வாகனங்கள்

தொடர்ந்து 2-வது நாளாக திம்பம் அருகே சோதனை சாவடியில் 5 கிலோ மீட்டர் தூரத்துக்கு வாகனங்கள் அணிவகுத்து நின்றன. இதனால் அந்த வாகனங்களின் டிரைவர்கள் மற்றும் பஸ் பயணிகள் மிகவும் அவதிப்பட்டனர். 

சத்தியமங்கலம் புலிகள் காப்பகத்தின் அடர்ந்த வனப்பகுதியில் திம்பம் மலைப்பாதை உள்ளது. இந்த திம்பம் மலைப்பாதையானது திண்டுக்கல்- பெங்களூரு தேசிய நெடுஞ்சாலையில் அமைந்து உள்ளது. தமிழ்நாடு மற்றும் கர்நாடக மாநிலங்களை இணைக்கும் முக்கிய பாதையாக திம்பம் மலைப்பாதை உள்ளதால் தினமும் ஆயிரக்கணக்கான வாகனங்கள் சென்று வருகின்றன. வனப்பகுதியில் உள்ள வனவிலங்குகள் அவ்வப்போது உணவு மற்றும் தண்ணீர் தேடி திம்பம் மலைப்பாதையை கடந்து செல்வது வழக்கம். அவ்வாறு சாலையை கடக்கும் வனவிலங்குகள், அந்த வழியாக செல்லும் வாகனங்களில் அடிபட்டு உயிரிழக்கின்றன.

இதுகுறித்த வழக்கை விசாரித்த சென்னை ஐகோர்ட்டு, ‘12 சக்கரங்களுக்கு மேல் உள்ள கனரக வாகனங்கள் மற்றும் 16.2 டன்னுக்கு மேல் எடையை ஏற்றி செல்லும் கனரக மற்றும் சரக்கு வாகனங்களுக்கு எப்போதுமே திம்பம் மலைப்பாதையில் அனுமதி இல்லை. 10 சக்கர மற்றும் 16.2 டன்னுக்கு குறைவான வாகனங்கள் காலை 6 மணி முதல் மாலை 6 மணி வரை செல்லலாம். அதுவும் அதிகபட்சமாக 30 கிலோ மீட்டர் வேகத்தில் தான் செல்ல வேண்டும். தமிழ்நாடு மற்றும் கர்நாடக மாநில அரசு பஸ்கள், ஆம்னி பஸ்கள், 3 சக்கர வாகனங்கள், மோட்டார்சைக்கிள் ஆகியவை காலை 6 மணி முதல் இரவு 9 மணி வரை மட்டுமே அனுமதிக்கப்பட வேண்டும்,’ என உத்தரவிட்டது. 

அனுமதிக்கவில்லை

இந்த நிலையில் ஐகோர்ட்டு உத்தரவு தெரியாமல் நேற்று முன்தினம் 12-க்கும் மேற்பட்ட சக்கரங்கள் கொண்ட கனரக வாகனங்கள் திம்பம் மலைப்பாதை வழியாக செல்வதற்காக தமிழக- கர்நாடக எல்லையில் உள்ள காரப்பள்ளம் சோதனை சாவடிக்கு வந்தன. ஆனால் வனத்துறையினர் கோர்ட்டு உத்தரவை காட்டி 12 சக்கரங்களுக்கு மேற்பட்ட கனரக வாகனங்களை திம்பம் மலைப்பாதையில் செல்ல அனுமதிக்கவில்லை.

இதனால் சோதனை சாவடியில் வாகனங்கள் அணிவகுத்து நின்றன. இதையடுத்து வனத்துறையினரிடம், வாகன ஓட்டிகள் வாக்குவாதத்தில் ஈடுபட்டனர். இதைத்தொடர்ந்து கனரக வாகனங்களை திம்பம் மலைப்பாதையில் செல்ல வனத்துறையினர் அனுமதித்தனர். 

இந்த நிலையில் திம்பம் மலைப்பாதை வழியாக செல்வதற்காக நேற்று காலை 6 மணிக்கு ஏராளமான வாகனங்கள் தமிழக- கர்நாடக எல்லையில் உள்ள காரப்பள்ளம் சோதனை சாவடிக்கு வந்தன. அப்போது அங்கு சோதனை சாவடியில் இருந்த வனத்துறையினர் ஒவ்வொரு வாகனங்களின் எடை அளவு குறித்த எடை ஆவணங்களையும் சோதனையிட்டனர். அப்போது 16.2 டன்னுக்கு குறைவான எடை அளவு கொண்ட வாகனங்களை மட்டுமே திம்பம் மலைப்பாதையில் செல்ல அனுமதித்தனர். 16.2 டன்னுக்கு மேல் உள்ள வாகனங்கள் மற்றும் எடை அளவு சீட்டு கொண்டு வராத வாகனங்களை வனத்துறையினர் அனுமதிக்கவில்லை. அந்த வாகனங்களை திருப்பி அனுப்பினர். ஒவ்வொரு வாகனங்களாக சோதனை செய்ததால் வாகனங்கள் செல்வதில் நேர தாமதம் ஆனது. இதன்காரணமாக காரப்பள்ளம் சோதனைச்சாவடியில் இருந்து 5 கிலோ மீட்டர் தூரத்துக்கு வாகனங்கள் அணிவகுத்து நின்றன. தொடர்ந்து 2-வது நாளாக வாகனங்கள் அணிவகுத்து நின்றதால் வாகன ஓட்டிகள், பஸ்சில் வந்த பயணிகள், சுற்றுலா பயணிகள் மிகவும் அவதிப்பட்டனர். அவர்கள் தங்களுடைய இடத்துக்கு குறிப்பிட்ட நேரத்துக்கு செல்ல முடியாமல் சிரமப்பட்டனர். மேலும் காய்கறிகள் ஏற்றி வந்த சரக்கு வேன்களும் குறிப்பிட்ட நேரத்துக்கு செல்ல முடியவில்லை. வாகனங்கள் அணிவகுத்து நின்றதால் கடும் போக்குவரத்து நெரிசல் ஏற்பட்டதுடன், 5 கிலோ மீட்டர் தூரத்தை ஒரு வாகனம் கடக்க 5 மணி நேரம் ஆனது.