கனமழை காரணமாக இமாச்சல பிரதேசத்திற்கு ஆரஞ்ச் எச்சரிக்கை - வானிலை மையம் அறிவிப்பு

சிம்லா,

இமாச்சல பிரதேச மாநிலத்தில் கடந்த சில தினங்களாக தொடர் கனமழை பெய்து வருகிறது. இதனால் அங்கு பல்வேறு பகுதிகளில் நிலச்சரிவுகளும், ஆறுகளில் வெள்ளப்பெருக்கும் ஏற்பட்டுள்ளது. கனமழை காரணமாக ஆகஸ்ட் 25-ந்தேதி வரை நிலச்சரிவு அபாயம் இருப்பதாக மாநில பேரிடர் மேலாண்மை வாரியம் தெரிவித்துள்ளது.

இதனிடையே இமாச்சல பிரதேச மாநிலத்தில் கனமழை மற்றும் அதனை தொடர்ந்து ஏற்பட்ட நிலச்சரிவுகள் காரணமாக 21 பேர் உயிரிழந்துள்ளதாகவும், 12 பேர் காயமடைந்துள்ளதாகவும், மேலும் 6 பேர் காணாமல் போனதாகவும் தெரிவிக்கப்பட்டுள்ளது.

இந்த நிலையில் இந்திய வானிலை ஆய்வு மையம் வெளியிட்டுள்ள அறிக்கையில், இமாச்சல பிரதேச மாநிலத்தில் அடுத்த 12 மணி நேரத்திற்கு அதிகனமழை பெய்ய வாய்ப்பு இருப்பதால் ஆரஞ்ச் எச்சரிக்கை விடுக்கப்படுவதாக அறிவிக்கப்பட்டுள்ளது. மேலும் அடுத்த 5 நாட்களுக்கு கன முதல் மிதமான மழை தொடர வாய்ப்புள்ளதாகவும் தெரிவிக்கப்பட்டுள்ளது.