உலகின் மிக ஆழமான வெரிவ்கினா குகை

இதன் ஆழம் 2,212 மீட்டர் ஆகும். அதாவது 7 ஆயிரத்து 257 அடி. இதன் நுழைவு வாசல் கடல் மட்டத்தில் இருந்து 2,285 மீட்டர், அதாவது 7 ஆயிரத்து 497 அடி உயரத்தில் இருக்கிறது. அந்த நுழைவு வாசலானது சுமார் 10 அடி மற்றும் 13அடி என்ற அளவில் குறுக்கு வெட்டாக அமைந்துள்ளது. 1968-ம் ஆண்டு இந்த குகை 'S-115' என்று அறியப்பட்டது. அதற்கு காரணம் கிராஸ்நோயார்ஸ்கில் இருந்து வந்தவர்களால் இந்த குகை கண்டறியப்பட்டு, அவர்கள் இதன் உள்ளே சென்றனர். அவர்களால் 115 மீட்டர் (377 அடி) வரை மட்டுமே செல்ல முடிந்தது. அதனால் இந்தப் பெயர் வழங்கப்பட்டது.

அதன்பின்னர் 1982-ல் மாஸ்கோவில் இருந்து வந்த ஒரு குழு, இந்தக் குகையை இரண்டாவது முறையாக கண்டறிந்து, அதன் உள்ளே சென்றது.

அவர்களால் இந்தக் குகைக்கு 'P1-7' என்று பெயரிடப்பட்டது. அந்தக் குழுவினர் 1986-ம் ஆண்டு வரை தொடர்ச்சியாக ஆய்வு செய்து, 440 மீட்டர் வரையான ஆழத்தை அடைந்தனர். இது 1,440 அடி ஆகும். 1983-ம் ஆண்டு குகை ஆய்வாளரில் ஒருவரான அலெக்சாண்டர் வெரவ்கின் என்பவர், ஒரு ஆய்வில் இறந்த காரணத்தால், அவருடைய பெயரில் இந்த குகையும் 'வெரிவ்கினா குகை' என்று பெயர் பெற்றது. 1986-ம் ஆண்டிற்குப் பிறகு, 2000-ம் ஆண்டு வரை இந்தக்குகையில் மேற்கொண்டு ஆய்வுகள் செய்யப் படவில்லை. அதன்பிறகு 2000-ம் ஆண்டு ஒரு புதிய குழு இந்த குகை பகுதிக்கு வந்து ஆய்வு செய்தது. 2015-ம் ஆண்டு வரை அவர்கள் குகையின் அடிப்பகுதியை ஆய்வு செய்தபோதிலும், அதன் ஆழம் 440 மீட்டராகவே இருந்தது. 2016-ம் ஆண்டு ஜூன் மாதம் இந்தக் குழு, இந்த குகைக்கு மற்றொரு நுழைவுப் பகுதி இருப்பதைக் கண்டுபிடித்தது. அதன் வழியாக ஆய்வு செய்தனர். 2019-ம் ஆண்டு ஆகஸ்டு மாதத்தில் இந்த குகையின் இறுதி ஆழம் 2,212 மீட்டர் (7,257 அடி) என்று உறுதி செய்யப்பட்டது.