ரேஷன்கடை காலி பணியிடங்களுக்கான நேர்முக தேர்வு

சிவகங்கை மாவட்ட கூட்டுறவு மண்டல இணைப்பதிவாளரும், மாவட்ட ஆள்சேர்ப்பு நிலைய தலைவருமான ஜினு விடுத்துள்ள அறிக்கையில் கூறியுள்ளதாவது:- சிவகங்கை மாவட்டத்தில் கூட்டுறவு நிறுவனங்களால் நடத்தப்பட்டு வரும் ரேஷன்கடைகளில் காலியாக உள்ள 91 விற்பனையாளர் பணியிடங்கள், 12 கட்டுநர் பணியிடங்களுக்கான நேர்முக தேர்வு வரும் 14-ந் தேதி முதல் தொடங்கி 23-ந் தேதி வரை சிவகங்கை கலெக்டர் அலுவகம் நுழைவு வாயில் எதிரே உள்ள மகாலில் நடைபெற உள்ளது. இந்த தேர்விற்கான ஹால் டிக்கெட்டுகளை கடந்த 3-ந் தேதி முதல் மாவட்ட ஆள்சேர்ப்பு நிலைய இணையதளம் http://www.drbsvg.net வாயிலாக பதிவிறக்கம் செய்து கொள்ளலாம் என ஏற்கனவே அறிவிக்கப்பட்ட நிலையில் தகுதியுள்ள 8 ஆயிரத்து 54 விண்ணப்பதாரர்களில் இதுவரை 4 ஆயிரத்து 509 பேர் மட்டுமே ஹால் டிக்கெட்டுகளை பதிவிறக்கம் செய்துள்ளனர். பதிவிறக்கம் செய்யாத விண்ணப்பதாரர்கள் இணையதளம் மூலம் பதிவிறக்கம் செய்யலாம்.

இவ்வாறு அதில் கூறப்பட்டுள்ளது.