*அமெரிக்காவின் அலாஸ்கா மாகாணத்தில் நேற்று சக்திவாய்ந்த நிலநடுக்கம் ஏற்பட்டது. ரிக்டர் அளவுகோலில் 6.4 புள்ளிகளாக பதிவான இந்த நிலநடுக்கத்தால் உயிர் இழப்பு ஏற்பட்டதாகவோ அல்லது யாரும் காயம் அடைந்ததாகவோ தகவல்கள் இல்லை. பெரிய அளவில் பொருள் சேதம் ஏற்பட்டதாகவும் தெரியவில்லை.

*சிரியா விவகாரம் தொடர்பான பேச்சுவார்த்தைக்காக ரஷியா, பிரான்சு, துருக்கி மற்றும் ஜெர்மனி ஆகிய 4 நாடுகள் கலந்து கொள்ளும் உச்சிமாநாட்டுக்கு ஏற்பாடுகள் செய்து வருவதாக ரஷிய வெளியுறவுத்துறை அமைச்சகம் தெரிவித்துள்ளது. இது தொடர்பாக ஆலோசனை நடத்த ரஷிய வெளியுறவுத்துறை மந்திரி செர்ஜி லாவ்ரோவ் நேற்று துருக்கி சென்றார்.

*தஜிகிஸ்தானில் 13 மலையேற்ற வீரர்களுடன் சென்ற ஹெலிகாப்டர் ஒன்று, மலைப்பகுதியில் தரையிறங்கிய போது விபத்துக்குள்ளானது. இதில் வீரர்கள் மற்றும் ஹெலிகாப்டர் ஊழியர்கள் என அதில் இருந்த 16 பேரும் பலியாகி இருக்கலாம் என அஞ்சப்படுகிறது. அங்கு மீட்பு பணிகளுக்காக 2 ஹெலிகாப்டர்கள் அனுப்பி வைக்கப்பட்டு உள்ளன.

*ஸ்பெயின் நாட்டின் விகோ நகரில் கடற்கரையோர இசை திருவிழா நடந்தது. ஆயிரக்கணக்கானோர் கலந்து கொண்ட இந்த நிகழ்ச்சியில் திடீரென விழா மேடை சரிந்து கடலுக்குள் விழுந்தது. இதில் 266 பேர் காயமடைந்ததாகவும், இதில் 5 பேருக்கு பலத்த காயம் ஏற்பட்டு இருப்பதாகவும் உள்ளூர் வானொலி அறிவித்தது.