திருப்பரங்குன்றம் விவகாரத்தில் விஜய்யின் நிலைப்பாடு என்ன? - கி.வீரமணி கேள்வி

சென்னை,

சென்னை வேப்பேரியில் உள்ள பெரியார் திடலில் திராவிடர் கழகத்தின் செயற்குழு கூட்டம் நேற்று நடைபெற்றது. கூட்டத்தில், சட்டசபை தேர்தலில் தி.மு.க.கூட்டணி வெற்றி பெற உழைக்க வேண்டும், மத்திய அரசு கொண்டு வந்துள்ள 4 தொகுப்பு சட்டங்களை திரும்ப பெற வேண்டும். மகாத்மா காந்தி தேசிய ஊரக வேலைவாய்ப்பு திட்டத்தில் காந்தி பெயரை நீக்கியதை கண்டிக்கிறோம் உள்ளிட்ட 8 தீர்மானங்கள் நிறைவேற்றப்பட்டது.

பின்னர், கி. வீரமணி நிருபர்களிடம் கூறியதாவது:-

நாள்தோறும் ஜனநாயக விரோத செயல்களை பா.ஜ.க.வும், ஆர்.எஸ்.எஸ். அமைப்பும் செய்து வருகிறது. அமலாக்கத்துறையை தவறான ஆயுதமாக பா.ஜ.க. பயன்படுத்தி வருகிறது. ஒரு கோடி வாக்காளர்கள் நீக்கப்பட உள்ளதாக செய்திகள் வருவது அதிர்ச்சியளிக்கிறது. இளம் பெரியார் எனும் தகுதி துணை முதல்-அமைச்சர் உதயநிதி ஸ்டாலினுக்கு இருக்கிறது. யாரெல்லாம் பெரியார் கொள்கையை தூக்கி பிடிக்கிறார்களோ அவர்கள் எல்லோரும் பெரியார்தான்.

பெரியார் வழியில் செல்கிறேன் என விஜய் சொல்கிறார். திருப்பரங்குன்றம் விவகாரத்தில் விஜய்யின் நிலைப்பாடு என்ன? கட்சி ஆரம்பித்து 2 ஆண்டுகள் ஆகியும் அவர் தனது கட்சியின் கொள்கையை இதுவரை சொல்லவில்லை. முதல்-அமைச்சராக வேண்டும் என்கிற முடிவை தவிர அவர் வேறு எந்த முடிவையும் அறிவிக்கவில்லை.

இவ்வாறு அவர் கூறினார்.