இந்த வருடம் பொங்கல் பண்டிகையில் ரஜினியின் பேட்ட, அஜித்குமாரின் விஸ்வாசம் படங்கள் திரைக்கு வந்து நல்ல வசூல் பார்த்தன. அடுத்த மாதம் பொங்கல் பண்டிகையில் வெளியாகும் படங்கள் எவை என்ற எதிர்பார்ப்பு நிலவியது. இந்த நிலையில் ரஜினியின் தர்பார், தனுசின் பட்டாஸ், சிவாவின் சுமோ ஆகிய 3 படங்களும் பொங்கலுக்கு திரைக்கு வருவது தற்போது உறுதியாகி உள்ளது.

தர்பார் படத்தில் ரஜினிகாந்த் போலீஸ் அதிகாரியாக வருகிறார். மும்பை தாதாக்களுக்கும் ரஜினிக்கும் நடக்கும் மோதலே கதை. கதாநாயகியாக நயன்தாரா நடித்துள்ளார். சுனில் ஷெட்டி, பிரதீக் பப்பர், யோகிபாபு ஆகியோரும் உள்ளனர். ஏ.ஆர்.முருகதாஸ் இயக்கி உள்ளார். படத்தின் டிரெய்லரும் பாடல்களும் ஏற்கனவே வெளியாகி வரவேற்பை பெற்றுள்ளன.

பொங்கலுக்கு முன்பாகவே ஜனவரி 9-ந்தேதி படத்தை திரைக்கு கொண்டு வர திட்டமிட்டுள்ளனர். இதனால் தமிழ்நாடு முழுவதும் அதிக தியேட்டர்களில் தர்பார் திரையிடப்படும். பட்டாஸ் படத்தில் தனுஷ் ஜோடியாக மெஹ்ரீன் நடித்துள்ளார். நாசர், நவீன் சந்திரா, சதீஷ், சினேகா ஆகியோரும் முக்கிய கதாபாத்திரங்களில் வருகிறார்கள். துரை செந்தில் குமார் இயக்கி உள்ளார்.

இந்த படத்தை ஜனவரி 16-ந்தேதி திரைக்கு கொண்டு வருகிறார்கள். சுமோ படத்தில் சிவா ஜோடியாக பிரியா ஆனந்த் நடித்துள்ளார். எஸ்.பி.ஹோசிமின் இயக்கி உள்ளார். ஜப்பானை சேர்ந்த முன்னாள் மல்யுத்த வீரர் யோஷினோரி தஷிரோவும் முக்கிய கதாபாத்திரத்தில் வருகிறார்.