கவின், நயன்தாரா உள்ளிட்டோர் நடிப்பில் உருவாகியுள்ள ‘ஹாய்’ படத்தின் ‘குடிகார நெஞ்சு’ பாடல் வெளியாகியுள்ளது.
தமிழ் சினிமாவின் முன்னணி நடிகையான நயன்தாரா, நடிகர் கவினுடன் இணைந்து நடித்துள்ள திரைப்படம் ‘ஹாய்’. லோகேஷ் கனகராஜிடம் உதவி இயக்குநராக பணியாற்றிய விஷ்ணு எடவன் இப்படத்தை இயக்கியுள்ளார். ‘7 ஸ்கிரீன் ஸ்டுடியோஸ்’ மற்றும் விக்னேஷ் சிவனின் ‘ரவுடி பிக்சர்ஸ்’ இணைந்து தயாரிக்கும் இப்படத்திற்கு ஜென் மார்டின் இசையமைத்துள்ளார்.
‘ஹாய்’ படத்தின் மூன்று பாடல்கள் ( ‘கண்ணக்குழியா’, ‘ரசகுல்லா’, ‘பச்ச புள்ள’) ஏற்கனவே வெளியாகி ரசிகர்கள் மத்தியில் நல்ல வரவேற்பை பெற்றுள்ளன. குறிப்பாக, விஷ்ணு எடவன் எழுதிய வரிகளில் ஜி.வி. பிரகாஷ் குமார் பாடிய ‘கண்ணக்குழியா’ பாடல் ரசிகர்களின் கவனத்தை ஈர்த்துள்ளது.
ஆகஸ்ட் 14-ம் தேதி வெளியாகும் என முதலில் அறிவிக்கப்பட்டிருந்த இப்படம், பின்னர் ஆகஸ்ட் 28-ம் தேதி திரையரங்குகளில் வெளியாகும் என படக்குழு அறிவித்தது. இதற்கான சிறப்பு வீடியோவும் வெளியிடப்பட்டது.
‘ஹாய்’ படத்தின் புதிய பாடலான ‘குடிகார நெஞ்சு’ வெளியானது. இந்தப் பாடலை நடிகர் சியான் விக்ரமின் மகனும், நடிகருமான துருவ் விக்ரம் பாடியுள்ளார்.