சென்னை,
இயக்குநர் முருகு இயக்கத்தில் ஜி.வி.பிரகாஷ் குமார் கதாநாயகனாக நடிக்கும் புதிய திரைப்படத்திற்கு ‘நிஞ்சா’ (Ninja) என பெயரிடப்பட்டுள்ளது.
தமிழ் சினிமாவில் முன்னணி இசையமைப்பாளர்களில் ஒருவராக வலம் வருபவர் ஜி.வி.பிரகாஷ் குமார். இசையமைப்பாளராக பல வெற்றிப் பாடல்களையும், பின்னணி இசையையும் வழங்கியுள்ள இவர், நடிகராகவும் தொடர்ந்து பல்வேறு படங்களில் நடித்து வருகிறார். ‘டார்லிங்’, ‘த்ரிஷா இல்லனா நயன்தாரா’, ‘சிவப்பு மஞ்சள் பச்சை’, ‘பேச்சுலர்’ உள்ளிட்ட படங்களில் கதாநாயகனாக நடித்துள்ள ஜி.வி.பிரகாஷ், தற்போது தனது அடுத்தடுத்த படங்களில் கவனம் செலுத்தி வருகிறார்.
இந்த நிலையில், இயக்குநர் முருகு இயக்கத்தில் ஜி.வி.பிரகாஷ் குமார் கதாநாயகனாக நடிக்கும் புதிய திரைப்படத்திற்கு ‘நிஞ்சா’ (Ninja) என பெயரிடப்பட்டுள்ளது. இப்படத்தின் மூலம் ஜி.வி.பிரகாஷ் மீண்டும் கதாநாயகனாக புதிய கதைக்களத்தில் களமிறங்குகிறார்.
‘நிஞ்சா’ திரைப்படத்தில் ஜி.வி.பிரகாஷ் குமாருடன் பாரத் மற்றும் பிரார்த்தனா நாதன் ஆகியோர் முக்கிய கதாபாத்திரங்களில் நடிக்கின்றனர். இப்படத்திற்கு இசையமைப்பாளராக ஷான் ரோல்டன் பணியாற்றுகிறார். வழக்கமாக இசையமைப்பாளராக இருக்கும் ஜி.வி.பிரகாஷ், இந்த முறை படத்தின் கதாநாயகனாக நடிக்க, ஷான் ரோல்டன் இசையமைப்பது கவனம் பெற்றுள்ளது.
இயக்குநர் முருகு இயக்கும் ‘நிஞ்சா’ திரைப்படத்தின் படப்பிடிப்பு வரும் ஆகஸ்ட் 24-ம் தேதி தொடங்குகிறது. படத்தின் மற்ற நடிகர்கள், தொழில்நுட்பக் கலைஞர்கள் மற்றும் வெளியீடு தொடர்பான கூடுதல் தகவல்கள் அடுத்தடுத்த நாட்களில் வெளியாகும் என எதிர்பார்க்கப்படுகிறது.