விஜய்யை மையப்படுத்தி ‘டிஎன் 2026’ படம் உருவாக்கப்பட்டதா? - தம்பி ராமையா பதில்

நடிகர் விஜய்யின் தமிழக வெற்றிக்கழகம் முதல் முறையாக சட்டமன்ற தேர்தல் களம் காண்கிறது. விஜய்யின் அரசியல் வருகையை விமர்சிக்கும் வகையில் இந்த படத்தில் காட்சிகள் இடம் பெற்று இருப்பது போல தெரிகிறது என்று அவரது ரசிகர்கள் சமூக வலைத்தளங்களில் நேற்று முதல் காரசாரமாக பதிவிட்டு வருகிறார்கள். நட்டி நட்ராஜ்ஜின் தோற்றம் விஜய் போன்றும், தம்பி ராமைய்யாவின் தோற்றம் தவெக பொதுச்செயலர் என். ஆனந்த் போன்றும் வடிவமைக்கப்பட்டுள்ளது. இதனால், டீசர் வெளியானதில் இருந்தே சமூக வலைத்தளங்களில் இந்த படம் குறித்த விவாதம் அதிகரித்துள்ளது.

இந்நிலையில் இது தொடர்பாக நடிகர் தம்பி ராமையா அண்மையில் அளித்த பேட்டியில் விளக்கம் கொடுத்துள்ளார். “டிஎன்2026 படத்தில், ‘படத்தை திரையிடு’ என்ற வசனம் இடம்பெற்றுள்ளது. அப்படியென்றால், அதிலும் ஜனநாயகன் படம் குறித்து பேசியிருக்கிறீர்களா?” என்ற கேள்விக்கு பதிலளித்து தம்பி ராமையா, “இந்தப் படத்தை எடுத்த பல மாதங்கள் ஆகிறது. இதற்கும் அதற்கும் சம்பந்தம் இல்லை. ஆனால், சூழல் இத்துடன் ஒத்துப்போகிறது. நாங்கள் எடுத்தது காட்சியாக வந்திருக்கிறது. அதுதான் ஆச்சரியம்.

10 நாட்கள் முன் நடந்த சம்பவத்தை படமாக்குவதற்கு குறைந்தபட்சம் 3 மாதங்கள் ஆகும். அப்படியென்றால், இப்போது நடக்கும் சம்பவங்களை எப்படி இப்போதே படமாக்க முடியும். வில்லிவாக்கத்தில் ஆதவ் அர்ஜூனா தேர்தல் பிரச்சாரத்தின் போது பாட்டில் ஒன்று வீசப்பட்டது. அதை காட்சிப்படுத்தி படத்தில் சேர்க்க வேண்டுமென்றால் 90 நாட்கள் ஆகும். ஆனால், இது நம் படத்தில் இருக்கிறது. இதை நாங்கள் எங்கள் குழந்தைப் பருவத்தில் நடந்த சம்பவத்தைத்தான் படத்தில் பதிவு செய்திருக்கிறோம். நாங்கள் படத்துக்காக எடுத்தது, தற்போது சம்பவங்களாக நடைபெறுகிறது. அதனால், அதற்கும் இதற்கும் சம்பந்தம் இல்லை” என அவர் தெரிவித்துள்ளார்.

ஆனால், நட்டி நட்ராஜின் தோற்றம், நடை, உடை, பாவனை விஜய்யை போலவே இருப்பதாக ரசிகர்கள் கருத்து தெரிவித்து வருகின்றனர்.