மும்பை மாநகராட்சி பைகுல்லா இ வார்டு அலுவலகத்தில் சீனியர் லைசென்ஸ் அதிகாரியாக பணிபுரிந்து வந்தவர் மகேஷ் பாகரே. தானேயில் வசித்து வந்த இவர், சம்பவத்தன்று பணி முடிந்து வீட்டிற்கு ஆட்டோவில் பயணம் செய்தார். கிழக்கு எக்ஸ்பிரஸ் நெடுஞ்சாலை விக்ரோலி அருகே சென்றபோது எதிர்பாராவிதமாக ஆட்டோ சாலையில் கவிழ்ந்து விபத்துக்குள்ளானது. இந்த விபத்தில் சாலையில் தூக்கிவீசப்பட்ட மாநகராட்சி அதிகாரி மகேஷ் படுகாயமடைந்தார். தகவல் அறிந்த போலீசார் அங்கு சென்று அவரை மீட்டு முல்லுண்டில் உள்ள ஆஸ்பத்திரிக்கு அனுப்பி வைத்தனர். அங்கு டாக்டர் நடத்திய பரிசோதனையில் ஏற்கனவே அவர் உயிரிழந்தது தெரியவந்தது. இது குறித்து போலீசார் விபத்து ஏற்படுத்திய ஆட்டோ டிரைவர் சகாதேவ் படேல் மீது வழக்கு பதிவு செய்து, அவரை கைது செய்தனர்.