ஆடிக் கிருத்திகை மற்றும் தெப்பத் திருவிழா... திருத்தணி முருகன் கோவிலில் குவிந்த பக்தர்கள்

தெப்பத்தில் எழுந்தருளும் சுவாமி

இன்று மாலை, முதல் நாள் தெப்பத் திருவிழா நடைபெற உள்ளது. மலைக்கோயில் காவடி மண்டபத்தில் இருந்து உற்சவர் வள்ளி, தெய்வானை சமேத முருகப்பெருமான், தேர் வீதியில் வலம் வந்து மலையடிவாரத்தில் உள்ள சரவணப் பொய்கையில் அலங்கரிக்கப்பட்டிருந்த தெப்பத்தில் எழுந்தருளி, குளத்தில் வலம் வந்து பக்தர்களுக்கு அருள்பாலிப்பார். நாளை 2-ம் நாள் தெப்ப உற்சவம், நாளை மறுநாள் 3-ம் நாள் தெப்ப உற்சவம் நடைபெற உள்ளது.

ஆடிக்கிருத்திகை விழாவை முன்னிட்டு லட்சக்கணக்கான பக்தர்கள் மலைக் கோவிலில் குவிந்துள்ளனர். மலையடிவாரத்தில் உள்ள சரவணப் பொய்கை திருக்குளத்தில் பக்தர்கள் புனித நீராடிவிட்டு படிகள் வழியாக பால் காவடி, பன்னீர் காவடி, புஷ்ப காவடி, மலர் காவடி, மயில் காவடிகளுடனும், அலகு குத்தியும் பக்திப் பரவசத்துடன் ‘அரோகரா’ முழக்கம் எழுப்பியபடி மலைக் கோவிலில் முருகப் பெருமானை வழிபட்டனர்.

ஆடிக் கிருத்திகையை முன்னிட்டு முருகப்பெருமானுக்கு இன்று அதிகாலை 5 மணிக்கு சிறப்பு அபிஷேகம் மற்றும் தீபாராதனை நடைபெற்றது. மேலும் தங்கக் கவசம், பச்சைக்கல் பதித்த வைர மாலை அணிவித்து சிறப்பு பூஜைகள் செய்யப்பட்டன.