அந்தியூர் பத்ரகாளியம்மன் கோவில்

அம்மனின் மகிமை

இக்கோவிலில் உள்ள கல்வெட்டுகளில், பண்டைய காலத்தில் போரில் எதிரிகளை வீழ்த்தியதற்கான சான்றுகள் உள்ளன. அந்த கல்வெட்டுகள் இன்றும் கோவில் அலுவலகத்தில் பாதுகாக்கப்படுகின்றன.

ஒரு சமயம் ஆங்கிலேயர்கள், இக்கோவிலில் தீ மிதித்த பக்தர்களை ஏளனம் செய்தனர். குண்டத்தின் மீது அரக்கை போட்டு, அதன்மீது நடக்க வேண்டும் என பக்தர்களை துன்புறுத்தி உள்ளனர். இதையடுத்து, பல்லி ஒன்று வாக்குசொல்லி குண்டத்தின் மீது ஊர்ந்து சென்றதாகவும், அதன்பிறகு, அந்த அரக்கின் மீது மக்கள் நடந்து சென்றாகவும் கூறப்படுகிறது. பக்தர்களை ஏளனம் செய்து துன்புறுத்திய ஆங்கிலேயர்களுக்கு கண் பார்வை பறிபோனதாகவும், பின்னர் அம்மனை வழிபட்டு மனமுருக வேண்டியதால் பார்வை கிடைத்ததாகவும் சொல்கிறார்கள்.

பக்தர்கள் எந்த செயலை தொடங்குவதற்கு முன்பும், அம்மனிடம் பூ வாக்கு கேட்கும் வழக்கம் தொன்றுதொட்டு இன்றும் நடைபெற்று வருவது இக்கோவிலின் முக்கிய சிறப்பு.

ராகு தோஷம்

மேலும், நவக்கிரகங்களில் ராகுவால் ஏற்படும் அனைத்து தோஷங்களையும் நீக்க வல்ல தலமாகவும் இக்கோவில் விளங்கி வருகிறது. ராகுவின் அதிதேவதையாக காளி விளங்குவதால், செவ்வாய்க்கிழமை, வெள்ளிக்கிழமை மற்றும் ஞாயிற்றுக்கிழமைகளில், ராகு காலங்களில் பக்தர்கள் எலுமிச்சை பழத்தில் விளக்கேற்றி வழிபடுகின்றனர். இதனால், ராகுவால் ஏற்படும் தோஷம் நீங்கும் என்பது பக்தர்களின் நம்பிக்கை.