கிளியனூர் அகஸ்தீஸ்வரர் கோவில்

கோவில் அமைப்பு

மேற்கு திசை நோக்கி அமைந்துள்ள இக்கோவில், சோழர்களால் கட்டப்பட்டதாகும். கிழக்கு மற்றும் மேற்கு பக்கங்களில் நுழைவுவாசல்கள் உள்ளன. மேற்கு நுழைவுவாசலின் மத்தியில் சிவபெருமான், பார்வதி தேவி சுதைச் சிற்பங்கள் காணப்படுகின்றன. அவர்களின் அருகில் அகத்தியரும், திருஞான சம்பந்தரும் வழிபடும் கோலத்தில் உள்ளனர். வலது பக்கமும், இடதுபக்கமும் விநாயகர் மற்றும் வள்ளி-தெய்வானை சமேத முருகப்பெருமான் காட்சி தருகிறார்கள்.

கிழக்கு வாசல் வழியாக நுழைந்ததும், விநாயகர் சன்னிதி காணப்படுகிறது. அதன் இடதுபுறம் அன்னை அகிலாண்டேஸ்வரி தனிச் சன்னிதியில் கிழக்கு நோக்கி காட்சி தருகிறார். கருவறையில் மூலவர் அகஸ்தீஸ்வரர் சுயம்பு மூர்த்தியாக மேற்கு நோக்கி அருள்பாலிக்கிறார். இறைவனின் எதிரில் நந்தி தேவர் காட்சி தருகிறார். நந்தியின் வலது பின்புறத்தில் அகத்தியர், சுவாமியை நோக்கி காணப்படுகிறார். நந்தியின் இடது பின்புறத்தில் ஜேஷ்டாதேவி, நாகர்கள் உள்ளனர். அடுத்ததாக கஜலட்சுமி, முருகன், நவக்கிரகங்கள் ஆகியோரது சன்னிதிகள் அமைந்துள்ளன.

கோவில் சுவர்களில் சோழர் காலத்தைச் சேர்ந்த பல கல்வெட்டுகள் காணப்படுகின்றன. பல்லவ, விஜயநகர மன்னர்களும் இக்கோவிலுக்கு திருப்பணி செய்துள்ளனர். கோவில் தல விருட்சமாக வன்னி மரமும், தல தீர்த்தமாக அக்னி தீர்த்தமும் உள்ளன.