பரமத்தி வேலூர்,
நாமக்கல் மாவட்டம், பரமத்தி வேலூர், பேட்டையில் உள்ள புது மாரியம்மன் கோவில் திருவிழா ஒவ்வொரு வருடமும் சித்திரை மாதம் நடைபெறுவது வழக்கம், அதேபோல் இந்த வருடமும் கம்பம் நடப்பட்டு பூச்சாட்டு விழாவுடன் திருவிழா தொடங்கியது.
26-ஆம் தேதி வரை தினந்தோறும் இரவு திருவீதி உலா நிகழ்ச்சி நடைபெறுகிறது. யானை, காமதேனு, அன்னம், சர்ப்பம் குதிரை, சிங்கம் உள்ளிட்ட வாகனங்களில் அம்மன் எழுந்தருளி வீதிஉலா வந்து பக்தர்களுக்கு அருள்பாலிக்க உள்ளார். இன்று 24-ஆம் தேதி அம்மனுக்கு பூச்சொரிதல் விழா நடைபெறுகிறது.
27ஆம் தேதி இரவு வடிசோறு நிகழ்ச்சி நடைபெறுகிறது. 28-ஆம் தேதி மாலை ஆண் பக்தர்கள் தீ மிதித்தல் நிகழ்ச்சியும், பெண்கள் பூவாரி (நெருப்பு) போட்டுக் கொள்ளும் நிகழ்ச்சியும் நடைபெறுகிறது. 29-ஆம் தேதி காலையில் பக்தர்கள் அலகு குத்தியும், அக்னி சட்டி எடுத்தும் நேர்த்திக்கடன் செலுத்துவார்கள். மாலையில் பொங்கல் மாவிளக்கு நிகழ்ச்சி நடைபெறும். இரவு அம்மன் ஊஞ்சல் உற்சவம் நடைபெறுகிறது.
30-ஆம் தேதி காலை கம்பம் காவேரி ஆற்றுக்கு செல்லுதலும், மே மாதம் 1-ஆம் தேதி மாலை மஞ்சள் நீராடல் நிகழ்ச்சியும் நடைபெறுகிறது.