திருப்பதி பிரம்மோற்சவ விழா ஏற்பாடுகள் என்னென்ன? தேவஸ்தான அதிகாரி விளக்கம்

திருமலை,

திருப்பதி ஏழுமலையான் கோவிலில் இந்த ஆண்டு வருடாந்திர பிரம்மோற்சவ விழா மற்றும் நவராத்திரி பிரம்மோற்சவ விழா என 2 பிரம்மோற்சவ விழாக்கள் நடக்க உள்ளன. அதையொட்டி திருமலையில் உள்ள சுதர்மா அரங்கில் தேவஸ்தான கூடுதல் செயல் அதிகாரி வெங்கையா சவுத்ரி தலைமையில் ஆய்வுக்கூட்டம் நடத்தப்பட்டது. கூட்டத்தில் வெங்கையா சவுத்ரி பேசியதாவது:-

திருப்பதி ஏழுமலையான் கோவிலில் இந்த ஆண்டு வருடாந்திர பிரம்மோற்சவ விழா, 3 ஆண்டுகளுக்கு ஒரு முறைக்கு நடக்கும் நவராத்திரி பிரம்மோற்சவ விழா நடக்க உள்ளது. முதலில் வருடாந்திர பிரம்மோற்சவ விழா நடப்பதையொட்டி செப்டம்பர் மாதம் 8-ந்தேதி கோவில் ஆழ்வார் திருமஞ்சனம் எனப்படும் தூய்மைப்பணி நடக்கிறது.

14-ந்தேதி மாலை பிரம்மோற்சவ விழா அங்குரார்ப்பணம், 15-ந்தேதி வருடாந்திர பிரம்மோற்சவ விழா கொடியேற்றம், 19-ந்தேதி கருட சேவை, 22-ந்தேதி தேரோட்டம், 23-ந்தேதி சக்கர ஸ்நானம் எனப்படும் சக்கரத்தாழ்வார் தீர்த்தவாரி நடக்கிறது. வாகன சேவைகள் தினமும் காலை 8 மணியில் இருந்து 10 மணி வரையிலும், இரவு 7 மணியில் இருந்து 9 மணி வரையிலும் நடக்கின்றன.