புதுடெல்லி,
நாடு முழுவதும் உள்ள மத்திய பல்கலைக்கழகங்களில் இளநிலை படிப்பில் சேர 'கியூட்' தேர்வில் தேர்ச்சி பெற்றிருப்பது கட்டாயமாக்கப்பட்டுள்ளது. 'கியூட்' தேர்வில் பெறும் மதிப்பெண்கள் அடிப்படையில் கலந்தாய்வு மூலம் மாணவர்களுக்கு கல்லூரிகள் ஒதுக்கப்படுகிறது.
அதன்படி, 2026-ம் ஆண்டிற்கான 'கியூட்' தேர்வு கடந்த 11-ந்தேதி தொடங்கி, 31-ந்தேதி வரை நடைபெறும் என அறிவிக்கப்பட்டிருந்தது. இதற்கிடையில், 28-ந்தேதி(இன்று) பக்ரீத் பண்டிகை வருவதால், தேர்வு தேதியை மாற்ற வேண்டும் என கோரிக்கைகள் எழுந்தன.
இதனை ஏற்று இளநிலை ‘கியூட்’ நுழைவுத் தேர்வுக்கான மாற்றப்பட்ட தேதிகளை தேசிய தேர்வு முகமை(என்.டி.ஏ.) அறிவித்துள்ளது. இதன்படி ‘கியூட்’ தேர்வுகள் மே 31, ஜூன் 6 மற்றும் 7 ஆகிய தேதிகளில் நடைபெறும் என அறிவிக்கப்பட்டுள்ளது.
மேலும், மே 31-ந்தேதி தேர்வில் பங்கேற்கும் மாணவர்களுக்கான ஹால் டிக்கெட் வெளியிடப்பட்டுள்ளதாகவும், அவற்றை cuet.nta.nic.in என்ற அதிகாரப்பூர்வ இணையதளத்தில் இருந்து பதிவிறக்கம் செய்துகொள்ளலாம் என்றும் என்.டி.ஏ. தெரிவித்துள்ளது. அதே சமயம், ஜூன் 6 மற்றும் 7-ந்தேதிகளுக்கான ஹால் டிக்கெட்டுகள் விரைவில் வெளியிடப்படும் என தெரிவிக்கப்பட்டுள்ளது குறிப்பிடத்தக்கது.