ஜே.இ.இ.மெயின் தேர்வுக்கு தயார் ஆவது எப்படி.. பாடத்திட்டங்கள் என்ன?- முழு விவரம்

ஜே.இ.இ மெயின் தேர்வில் பிளஸ் 1 மற்றும் பிளஸ் 2 படிப்புகளில் இடம் பெற்ற இயற்பியல், வேதியியல் மற்றும் கணிதம் ஆகிய பாடங்கள் அடிப்படையில் கேள்விகள் அமைகின்றன.எனவே, இந்த பாடங்கள் பற்றிய தெளிவான புரிதலும், வேகத்துடனும், விவேகத்துடனும் துல்லியமுடனும் பதில் எழுதும் திறமையையும் எஸ்.எஸ்.எல்.சி. படிக்கும்போதே, வளர்த்துக் கொள்வதும் கண்டிப்பான தேவையாகும்.

ஆறு மாத அடிப்படைப் பயிற்சி

என்.சி.இ.ஆர்.டி (NCERT) நூல்களை வாங்கி வைத்து இயற்பியல், வேதியியல் மற்றும் கணிதப் பாடங்களை படிப்பது நல்லது. இதன்மூலம் அடிப்படை அறிவை வளர்த்துக் கொள்ளலாம். இந்தப் பயிற்சியை தொடக்கத்தில் முதல் ஆறு மாதங்களுக்கு நடைமுறைப்படுத்துவது நல்லது.இவைதவிர, ஒவ்வொரு பாடத்தில் இடம்பெற்றுள்ள தலைப்புகளில் குறிப்புகளை எடுத்துக்கொள்வதும் சிறந்ததாகும். குறிப்புகள் எடுக்கும்போதே, ஏன்? எப்படி? எதற்கு? எங்கு? எதனால்? எப்பொழுது?- என சில கேள்விகளைக் கேட்டு அதற்கான பதில்களையும் கண்டறிந்து அதிக கவனத்தோடு படிப்பது நல்லது.

மூன்று மாத முழுமையான பயிற்சி

ஜே.இ.இ.மெயின் தேர்வுக்கான முதல் ஆறு மாத பயிற்சிகளை நிறைவு செய்தபின்பு, அடுத்தக் கட்டமாக மூன்று மாதங்களுக்கு முழுமையான பயிற்சியை மேற்கொள்ள வேண்டும். கடந்த ஆண்டுகளில் நடைபெற்ற ஜே.இ.இ மெயின் தேர்வு வினாத்தாள்களை சேகரித்து, அவற்றிற்கான பதில்களை குறிப்பிட்ட நேரத்திற்குள் எழுதிப் பார்த்து பயிற்சி செய்ய வேண்டும்.குறைந்தபட்சம் 10 ஆண்டுகளுக்கான கேள்வித்தாள்களுக்கான சரியான பதிலை கண்டுபிடித்து அதனை முழுமையாக மனதில் நிறுத்திக்கொள்வது நல்லது.

ஒவ்வொரு பாடத்திலும் தனித்தனியாக தலைப்புகள் அடிப்படையில் குறிப்புகளை வைத்துக்கொண்டு பாடங்களை நினைவில் கொள்வது சிறந்த பயிற்சியாகும். மேலும், புரிந்து கொள்வதற்கு கடினமான பாடப்பகுதிகளைதிரும்பத்திரும்ப படித்து, மனதில் நிறுத்தி, தேர்வு நேரத்தில் பயன்படுத்திக் கொள்ளும் விதத்தில் பயிற்சிகளை மேற்கொள்ள வேண்டும்.

திருப்புதல் தேர்வு பயிற்சி

ஒவ்வொரு பாடத் தலைப்பிலும் கேள்விகளை தேர்ந்தெடுத்து திரும்பத் திரும்ப பதில் எழுதி விரைவாக பதில் எழுதும் பயிற்சியை மேற்கொள்ளலாம். அதாவது, “ரிவிஷன் டெஸ்ட்” எனப்படும் “திருப்புதல் தேர்வு” எழுதும் பழக்கத்தை வழக்கமாக்கிக் கொள்வது நல்லது. திருப்புதல் தேர்வு பயிற்சியின்மூலம் விடைகள் எழுதும்போது, என்னென்ன தவறுகள் ஏற்படுகின்றன? என்பதை தெரிந்துகொள்ளலாம்.

மேலும், தவறுகளை திருத்தவும், குறிப்பிட்ட நேரத்திற்குள் பதில் எழுதவும் தேவையான பயிற்சியை எளிதில் பெற இயலும். நினைவில் நிற்கும் ஃபார்முலாக்களை திரும்பத்திரும்ப எழுதி பார்ப்பதன்மூலம் அதிக மதிப்பெண்கள் இந்தத் தேர்வில் பெற வாய்ப்பு உள்ளது.