பிளஸ்-2, பிளஸ்-1 வகுப்புக்கான பொதுத் தேர்வு தொடங்கி நிறைவு பெற்ற நிலையில், தற்போது எஸ்.எஸ்.எல்.சி. வகுப்புக்கான பொதுத்தேர்வு தொடங்கி நடைபெற்று வருகிறது. இதில் பிளஸ்-2 பொதுத்தேர்வு கடந்த மாதம் (மார்ச்) 3-ந்தேதி ஆரம்பித்து 25-ந்தேதியுடன் முடிவடைந்தது. அந்த தேர்வை சுமார் 8 லட்சத்துக்கும் மேற்பட்ட மாணவ-மாணவிகள் எழுதி இருந்தனர்.

தமிழ், ஆங்கிலம், கணிதம், வேதியியல், இயற்பியல் உள்ளிட்ட பல்வேறு பாடங்களுக்கான தேர்வை மாணவ-மாணவிகள் எழுதிய நிலையில், அதற்கான விடைத்தாள்கள் சேகரிக்கப்பட்டு பாதுகாப்பாக வைக்கப்பட்டன. இதனைத் தொடர்ந்து இன்று (வெள்ளிக்கிழமை) முதல் பிளஸ்-2 பொதுத் தேர்வு விடைத்தாள் திருத்தும் பணிகள் தொடங்க இருக்கின்றன. வருகிற 17-ந்தேதி (வியாழக்கிழமை) பணிகள் நடைபெற உள்ளன.