மும்பை,
மராட்டிய மாநில அரசு போக்குவரத்து கழக ஊழியர்கள் 7வது ஊதிய குழு பரிந்துரைப்படி சம்பள உயர்வு வழங்கவேண்டும் என வலியுறுத்தி தீபாவளி பண்டிகையின் போது 4 நாட்கள் தொடர் வேலை நிறுத்தப்போராட்டத்தில் ஈடுபட்டனர். தீபாவளி சமயத்தில் நடந்த இந்த போராட்டத்தால் பொது மக்கள் கடும் அவதி அடைந்தனர். ஐகோர்ட்டு உத்தரவிற்கு பிறகு போராட்டம் கைவிடப்பட்டது.
இந்தநிலையில் 4 நாட்கள் போராட்டத்தில் ஈடுபட்ட ஊழியர்களுக்கு 36 நாள் சம்பளம் பிடித்தம் செய்யப்படும் என்ற தகவல் பரவியது. இதனால், போக்குவரத்து ஊழியர்கள் அதிர்ச்சிக்குள்ளானார்கள்.
இந்தநிலையில் இது குறித்து மாநில போக்குவரத்து துறை மந்திரி திவாகர் ராவ்தே கூறுகையில், 4 நாள் வேலை நிறுத்தப்போராட்டத்தில் ஈடுபட்ட ஊழியர்களுக்கு 4 நாள் சம்பளம் மட்டுமே பிடித்தம் செய்யப்படும் என்றார்.
மேலும், வேலை நிறுத்தப் போராட்டத்தில் ஈடுபட்ட ஊழியர்களுக்கு இ.எல். விடுப்பில் இருந்தும் 8 நாட்கள் கழிக்கப்படும் என்று போக்குவரத்து கழக அதிகாரி ஒருவர் கூறினார்.