தெற்கு ரெயில்வேயின் சென்னை கோட்டம் கடந்த ஜூலை மாதம், ஆட்டோமொபைல் சரக்கு போக்குவரத்தில் தனது முந்தைய சாதனையை முறியடித்துள்ளது. கடந்த மாதத்தில் சென்னை ரெயில்வே கோட்டம், 75 சரக்கு ரெயில்களை இயக்கி புதிய உச்சத்தை அடைந்துள்ளது.

இந்த ஆட்டோமொபைல் சரக்கு போக்குவரத்து மூலம் ரூ.17.95 கோடி வருவாய் ஈட்டியுள்ளது. இதில் 32 ரெயில்கள் வாலாஜாபாத் சரக்கு பணிமனையிலிருந்தும், 43 ரெயில்கள் மேல்பாக்கம் சரக்கு பணிமனையிலிருந்தும் இயக்கப்பட்டன. மொத்தம் 1,950 வேகன்களில் ஆட்டோமொபைல் சரக்குகள் ஏற்றப்பட்டன. சென்னை ரெயில்வே கோட்டம், இதுவரை ஒரே மாதத்தில் கையாண்ட ஆட்டோமொபைல் போக்குவரத்துக்கான சரக்கு ரெயில்கள் மற்றும் ஈட்டப்பட்ட வருவாய் ஆகியனவற்றுள் இதுவே மிக அதிகமானதாகும்.