கொடுமுடியில் கடந்த 3-ந் தேதி அன்று சுல்தான்பேட்டை மற்றும் காங்கேயம் சாலை ரோஜா நகரைச் சேர்ந்த 2 பேர் டெல்லி சென்று வந்தனர். இதனால் 2 பேரும் பெருந்துறை மருத்துவமனையில் அனுமதிக்கப்பட்டு சிகிச்சை பெற்று வருகிறார்கள். எனவே சுல்தான்பேட்டை, ரோஜா நகரில் உள்ள 463 குடும்பங்களை சேர்ந்த 1,100 பேர் தனிமைப்படுத்தப்பட்டு சுகாதாரத்துறையினரால் கண்காணிக்கப்பட்டு வருகிறார்கள்.

இந்த நிலையில் இந்த பகுதிகளை ஆய்வு செய்வதற்காக ஈரோடு மாவட்ட கலெக்டர் சி.கதிரவன் நேற்று வந்தார். முதலில் அவர் சுல்தான்பேட்டை பகுதிக்கு சென்று கொரோனா முன்னெச்சரிக்கை நடவடிக்கை குறித்தும், சுகாதார பணியாளர்கள் தினமும் எடுத்த புள்ளி விவரங்கள் குறித்தும் சுகாதாரத்துறை வட்டார மருத்துவ அலுவலர் மேகநாதன், டாக்டர்கள், செவிலியர்கள் மற்றும் பேரூராட்சி செயல் அலுவலர் விஜயநாத் ஆகியோரிடம் கேட்டறிந்தார்.