பெருநகர சென்னை மாநகராட்சிக்கு உட்பட்ட பகுதிகளில் கொரோனா தொற்று பாதுகாப்பு வழிமுறைகளை கடைப்பிடிக்க மாநகராட்சி, போலீசாருடன் இணைந்து பல்வேறு நடவடிக்கைகளை மேற்கொண்டு வருகின்றது. 9 சிறப்பு கண்காணிப்பு குழுக்கள் மேற்கொண்ட கள ஆய்வில் புரசைவாக்கம், தியாகராய நகர், ராயபுரம் மற்றும் பாடி ஆகிய பகுதிகளில் கொரோனா பாதுகாப்பு வழிமுறைகளை பின்பற்றாத 64 கடைகளில் நேற்று இரவு 7 மணி அளவில் ரூ.1 லட்சத்து 42 ஆயிரத்து 900 அபராதம் விதிக்கப்பட்டுள்ளது.சென்னை முழுவதும் நேற்று ஒரு நாள் மட்டும் அரசின் பாதுகாப்பு வழிமுறைகளை பின்பற்றாத வணிக வளாகங்கள், அங்காடிகள் மற்றும் தனி நபர்களிடம் இருந்து மொத்தம் ரூ.2 லட்சத்து 9 ஆயிரத்து 300 அபராதம் வசூலிக்கப்பட்டுள்ளது. நேற்று முன்தினம் மேற்கொள்ளப்பட்ட கள ஆய்வில் ரூ.3 லட்சத்து 33 ஆயிரத்து 800 அபராதமும், நேற்று ரூ.2 லட்சத்து 9 ஆயிரத்து 300 அபராதமும் என 2 நாட்களில் மொத்தம் ரூ.5 லட்சத்து 43 ஆயிரத்து 100 அபராதம் விதிக்கப்பட்டுள்ளது.

எனவே வணிக நிறுவனங்கள், வணிக வளாகங்கள் மற்றும் அங்காடிகள் அரசின் நிலையான பாதுகாப்பு வழிமுறைகளை தவறாமல் பின்பற்ற வேண்டும் என கேட்டுகொள்ளப்படுகிறது.