கடைவீதிகளுக்கு சென்று பொருட்கள் வாங்கிவிட்டு வெளியே வரும் பொதுமக்களால் விழுப்புரம் நகரில் கடும் போக்குவரத்து நெரிசல் ஏற்பட்டு வருகிறது. குறிப்பாக விழுப்புரம்- புதுச்சேரி சாலையில் வாகனங்கள் செல்ல முடியாமல் போக்குவரத்து ஸ்தம்பிப்பு ஏற்படுகிறது.

இந்த போக்குவரத்து நெரிசலை சரிசெய்ய கூடுதலாக போக்குவரத்து போலீசார் பணியில் ஈடுபடுத்தப்பட்டுள்ளனர். இருப்பினும் போக்குவரத்து நெரிசலில் சிக்கி வாகனங்கள் சீரான வேகத்தில் சென்று வருவதை காண முடிகிறது.

தீவிர கண்காணிப்பு

மேலும் கூட்ட நெரிசலை பயன்படுத்தி பொதுமக்களிடம் திருடர்கள் தங்கள் கைவரிசையை காட்ட நேரிடும் என்பதால் நகை பறிப்பு, திருட்டு உள்ளிட்ட குற்ற சம்பவங்கள் ஏற்படாமல் முற்றிலும் தடுக்கும் வகையிலும், பொதுமக்களின் கூட்டத்தை கண்காணிக்கும் வகையிலும் விழுப்புரம் நகரில் பலத்த போலீஸ் பாதுகாப்பு போடப்பட்டுள்ளது.

மக்கள் நடமாட்டம் மிகுந்த பகுதிகளான விழுப்புரம் வீரவாழியம்மன் கோவில், பழைய பஸ் நிலையம், காமராஜர் சாலை, புதிய பஸ் நிலையம் உள்ளிட்ட முக்கிய இடங்களில் போலீசார், கண்காணிப்பு கோபுரங்களை அமைத்து அதிலிருந்தபடியே தீவிர கண்காணிப்பு பணியில் ஈடுபட்டு வருவதோடு ஒலிப்பெருக்கி மூலமாக பொதுமக்களுக்கு விழிப்புணர்வை ஏற்படுத்தி போக்குவரத்தையும் சரிசெய்து வருகின்றனர்.