இதனால் ஆத்திரமடைந்த பயணிகள் நூற்றுக்கும் மேற்பட்டோர் பஸ் நிலையம் முன்பு சென்னை-திருச்சி தேசிய நெடுஞ்சாலையில் திரண்டு, திடீர் மறியல் போராட்டத்தில் ஈடுபட்டனர். அப்போது அவர்கள் போதிய பஸ்களை இயக்க நடவடிக்கை எடுக்காத அதிகாரிகளை கண்டித்தும், போதிய பஸ்களை உடனடியாக இயக்க கோரியும் கண்டன கோஷங்கள் எழுப்பினர். ஒரு சில பயணிகள் பஸ் நிலையத்தில் பணியில் இருந்த அரசு போக்குவரத்துக்கழக அதிகாரிகள், ஊழியர்களிடம் வாக்குவாதத்தில் ஈடுபட்டனர். இதனால் அதிர்ச்சியடைந்த போக்குவரத்துக்கழக அதிகாரிகள், ஊழியர்கள் பஸ் நிலையத்தில் இருந்து ஓட்டம் பிடித்தனர். இதனால் அங்கு பெரும் பரபரப்பு ஏற்பட்டது.

இதுபற்றி தகவல் அறிந்த விழுப்புரம் தாலுகா போலீசார் சம்பவ இடத்துக்கு விரைந்து வந்து, மறியலில் ஈடுபட்ட பயணிகளை சமாதானப்படுத்தினர். இதையடுத்து பயணிகள் அங்கிருந்து கலைந்து சென்றனர். அப்போது வசதி படைத்த சிலர் வாடகை கார்கள் மூலம் சொந்த ஊர்களுக்கு புறப்பட்டு சென்றனர். பலர் குடும்பத்துடன் பஸ் நிலைய வளாகத்தில் நேற்று அதிகாலை வரை பெரும் சிரமங்களுக்கு இடையே படுத்தபடி காத்திருந்து, பஸ்கள் வந்ததும் சொந்த ஊர்களுக்கும், தாங்கள் பணிபுரியும் இடங்களுக்கும் சென்றனர். இந்த சம்பவத்தால் அங்கு சிறிது நேரம் பரபரப்பு ஏற்பட்டது.