கருடன் மீது ஏறி அங்கு வந்த பெருமாள், தனது சக்ராயுதத்தால் கூகூ முதலையை அழித்து கந்தர்வனுக்கும், யானையான கஜேந்திரனுக்கும் சாப விமோசனம் வழங்கினார். இந்நிகழ்ச்சியே கஜேந்திர மோட்சம் ஆகும். இந்த நிகழ்ச்சி சித்ரா பவுர்ணமி நாளில் நடந்ததால் ஒவ்வொரு ஆண்டும் சித்ரா பவுர்ணமியன்று ஸ்ரீரங்கம் அம்மா மண்டபம் படித்துறையில் இந்நிகழ்ச்சி நடத்தி காட்டப்படுகிறது.

அதன்படி இந்த ஆண்டு கஜேந்திர மோட்சம் நிகழ்ச்சி நேற்று நடைபெற்றது. இதையொட்டி ஸ்ரீரங்கம் கோவில் உற்சவர் நம்பெருமாள் நேற்று காலை 7.30 மணிக்கு மூலஸ்தானத்தில் இருந்து புறப்பட்டு வழிநடை உபயங்கள் கண்டருளி, காவிரி ஆற்றின் அம்மா மண்டபம் படித்துறையில் உள்ள ஆஸ்தான மண்டபத்தில் காலை 10.30 மணிக்கு எழுந்தருளினார்.

அங்கு பகல் 12 மணி முதல் மதியம் 2 மணி வரை திருமஞ்சனம் கண்டருளினார். பின்னர் ஆஸ்தான மண்டபத்தில் இருந்து மாலை 6 மணிக்கு புறப்பட்டு காவிரி ஆற்றுக்கு சென்றார்.

அங்கு நம்பெருமாள், கஜேந்திர மோட்சம் அளிக்கும் நிகழ்ச்சி மாலை 6.15 மணிக்கு நடைபெற்றது. அப்போது ஸ்ரீரங்கம் கோவில் யானை ஆண்டாள் கஜேந்திரனாக நடித்து காட்டியது. இதை ஏராளமான பக்தர்கள் பார்த்து பரவசம் அடைந்தனர். பின்னர் இரவு 8.15 மணிக்கு நம்பெருமாள் அம்மா மண்டபத்தில் இருந்து புறப்பட்டு இரவு 9.15 மணிக்கு மூலஸ்தானம் சென்றடைந்தார்.

கஜேந்திர மோட்சம் நிகழ்ச்சியின் போது அம்மா மண்டபத்தில் ஸ்ரீரங்கம் போலீஸ் இன்ஸ்பெக்டர் உமாசங்கர் தலைமையில் ஏராளமான போலீசார் பாதுகாப்பு பணியில் ஈடுபட்டிருந்தனர்.