சிதம்பரம் ஞானபிரகாசம் தெருவை சேர்ந்த சேது என்பவரது மனைவி திலகவதி(வயது 66). இவருடைய பேரன் ராஜ்கமல்(20). பி.எஸ்சி. 2-ம் ஆண்டு படித்து வரும் இவர், போலீஸ் நண்பர்கள் குழுவிலும் இருந்து வருகிறார். இந்த நிலையில் நேற்று காலை திலகவதி தனது பேரனுடன் சிதம்பரம் தெற்கு வீதியில் உள்ள ஒரு வங்கிக்கு சென்றார்.

அங்கு அவர் தனது கணக்கில் இருந்து ரூ.4 லட்சத்தை எடுத்து, அதை ஒரு பையில் வைத்துக்கொண்டு வெளியே வந்தார். அப்போது வங்கி முன்புள்ள சாலையில் 50 ரூபாய் நோட்டுகள் கீழே கிடந்தன. இதை பார்த்த திலகவதி, ரூபாய் நோட்டுகளை எடுக்க முயன்றார். அந்த சமயத்தில் அங்கிருந்த மர்ம மனிதர் ஒருவர், திலகவதி வைத்திருந்த பணப் பையை பறித்துக்கொண்டு மோட்டார் சைக்கிளில் தயாராக இருந்த மற்றொரு மர்ம மனிதருடன் சேர்ந்து தப்பி சென்றார்.