இந்தநிலையில் பஞ்சாப், அசாம், ஆந்திரா, குஜராத் ஆகிய 4 மாநிலங்களில் கடந்த சில தினங்களுக்கு முன்பாக கொரோனா தடுப்பூசி ஒத்திகை வெற்றிகரமாக நடந்து முடிந்துள்ளது.

இந்தநிலையில் அனைத்து மாநிலங்களிலும், யூனியன் பிரதேசங்களிலும் இன்று (சனிக்கிழமை) ஒரே நேரத்தில் கொரோனா தடுப்பூசி ஒத்திகை நடத்துமாறு அறிவுறுத்தப்பட்டுள்ளது.

ஒவ்வொரு மாநில தலைநகரங்களிலும் குறைந்தது 3 இடங்களில் தடுப்பூசி ஒத்திகை நடத்த வேண்டும் என்று கூறப்பட்டுள்ளது.

இதற்கிடையே கொரோனா தடுப்பூசிக்காக மராட்டியத்தில் புனே, நாக்பூர், ஜல்னா, நந்தூர்பர் ஆகிய 4 மாவட்டங்கள் தேர்வு செய்யப்பட்டு இருப்பதாக மாநில சுகாதாரத்துறை மந்திரி ராஜேஷ் தோபே தெரிவித்து உள்ளார். இதுகுறித்து அவர் மேலும் கூறியதாவது:-

இந்த தடுப்பூசி ஒத்திகையின் நோக்கம், தடுப்பூசி தொடர்பான பணிகளுக்காக திட்டமிடல் மற்றும் அதை செயல்படுத்துதலில் உள்ள தொடர்புகளை மதிப்பிடுதல், சவால்களை அடையாளம் காணுதல் உள்ளிட்டவை ஆகும்.

ஒத்திகை நடைபெறும் இடங்களில் போதுமான இடவசதி இருக்கிறதா, தளவாட ஏற்பாடுகள் உள்ளனவா, இணையதள வசதி உள்ளதா, மின்சார வினியோகம் சீராக உள்ளதா, பாதுகாப்பு அம்சங்கள் சரியாக உள்ளனவா என்பதை உறுதி செய்ய வேண்டும். இதற்கான வழிகாட்டுதலை மத்திய சுகாதாரத்துறை வெளியிட்டு உள்ளது. இவ்வாறு அவர் கூறினார்.