கோவை பெரியநாயக்கன்பாளையம் அருகே நாயக்கன்பாளையம் புது பாலத்தின் கீழ் பகுதியில் பாதி எரிந்த நிலையில் வாலிபர் பிணம் கிடந்தது. இதை அந்த வழியாக சென்றவர்கள் பார்த்து அதிர்ச்சி அடைந்தனர். அவர்கள் கொடுத்த தகவலின் பேரில் பெரியநாயக்கன்பாளையம் போலீஸ் இன்ஸ்பெக்டர் பிரிதீவ்ராஜ் மற்றும் போலீசார் சம்பவ இடத்துக்கு விரைந்து சென்றனர்.

பின்னர் அவர்கள், அங்கு எரிந்த நிலையில் கிடந்த பிணத்தை பார்வையிட்டனர். பிணமாக கிடந்தவருக்கு சுமார் 35 வயது இருக்கும் என்பது தெரிந்தது. ஆனால் அவர் யார்? எந்த ஊரைச் சேர்ந்தவர் என்பது தெரியவில்லை. வாலிபர் பிணமாக கிடந்த இடத்தின் அருகே ரத்தம் அதிகஅளவில் உறைந்து கிடந்தது. இதனால் அவர் அடித்துக் கொலை செய்யப்பட்டு, பின்னர் தீ வைத்து எரிக்கப்பட்டு இருக்கலாம் என்று தெரிகிறது. மேலும் அவர் யார்? என்று அடையாளம் தெரியக்கூடாது என்பதற்காக முகத்தை சிதைத்து தீ வைத்து எரித்துள்ளனர்.