விளாத்திகுளம்,

விளாத்திகுளம் அருகே ஜமீன் கரிசல்குளம் வடக்கு தெருவைச் சேர்ந்தவர் கருத்தப்பாண்டி (வயது 40). இவர் விளாத்திகுளத்தில் உள்ள இனிப்பு கடையில் தொழிலாளியாக வேலை செய்து வந்தார்.

இவர் நேற்று முன்தினம் இரவில் தனது ஊரில் நாகலாபுரம் ரோடு பகுதியில் உள்ள ஓடைப்பாலத்தின் தடுப்பு சுவரில் படுத்து தூங்கினார். அப்போது அவர் எதிர்பாராதவிதமாக பாலத்தின் அடியில் தவறி விழுந்தார். சுமார் 8 அடி ஆழ பள்ளத்தில் பாறையில் விழுந்ததால், பலத்த காயம் அடைந்த கருத்தப்பாண்டி சம்பவ இடத்திலேயே பரிதாபமாக உயிரிழந்தார்.

நேற்று காலையில் அந்த வழியாக சென்றவர்கள், இதனைப் பார்த்து அதிர்ச்சி அடைந்தனர். இதுகுறித்து விளாத்திகுளம் போலீஸ் நிலையத்துக்கு தகவல் தெரிவித்தனர்.

உடனே போலீசார் விரைந்து சென்று, இறந்த கருத்தப்பாண்டியின் உடலைக் கைப்பற்றி, பிரேத பரிசோதனைக்காக விளாத்திகுளம் அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.