அம்மா மக்கள் முன்னேற்ற கழகத்தின் துணை பொதுச்செயலாளர் டி.டி.வி. தினகரன் தமிழகம் முழுவதும் மக்கள் சந்திப்பு புரட்சி பயணம் மேற்கொண்டு வருகிறார். அந்த வகையில் நேற்று முன்தினம் சேலத்தில் மக்கள் சந்திப்பு புரட்சி பயணத்தை முடித்துக்கொண்டு விழுப்புரம் மாவட்டம் கல்வராயன் மலையில் உள்ள வெள்ளி மலைக்கு வந்தார். பின்னர் அவர் திறந்த வேனில் நின்றபடி பொதுமக்கள் மத்தியில் பேசினார். அப்போது அவர் கூறியதாவது:-

தமிழகத்தில் நீட் தேர்வு இருக்கக்கூடாது என்று முன்னாள் முதல்-அமைச்சர் ஜெயலலிதா கூறி வந்தார். ஆனால் இப்போது நடைபெறுவது ஜெயலலிதாவின் ஆட்சி என்று கூறிக்கொள்ளும் முதல்-அமைச்சர் எடப்பாடி பழனிசாமி நீட் தேர்வுக்கு அனுமதி அளித்துள்ளார்.