அணையின் பாதுகாப்பு கருதி கடந்த 25-ந்தேதி காலை நீர்த்தேக்கத்தில் இருந்து மதகுகள் வழியாக ஆரணி ஆற்றில் தண்ணீர் திறந்து விடப்பட்டது. வினாடிக்கு 400 கனஅடி வீதம் தண்ணீர் திறக்கப்பட்டது. இந்தநிலையில் மழை பொய்த்து போனதால் நீர்த்தேக்கத்துக்கு நீர்வரத்து குறைந்தது. இதனால் நேற்று காலை முதல் தண்ணீர் திறப்பு வினாடிக்கு 100 கன அடியாக குறைக்கப்பட்டது. பிச்சாட்டூர் நீர்த்தேக்கத்தின் உயரம் 28.1 அடி ஆகும். இதில் 1.853 டி.எம்.சி. தண்ணீரை சேமித்து வைக்கலாம். நேற்று காலை நீர்மட்டம் 27 அடியாக பதிவானது. 1.650 டி.எம்.சி. தண்ணீர் இருப்பு உள்ளது. அணைக்கு நீர்வரத்து வினாடிக்கு வெறும் 90 கன அடியாக இருந்தது.