சென்னையை அடுத்த குரோம்பேட்டை, நாகல்கேணியை சேர்ந்தவர் கோட்டையா (வயது 45). இவர், பல்லாவரம் நகராட்சி அலுவலகத்தில் தூய்மை பணியாளராக வேலை செய்து வருகிறார். நேற்று காலை குரோம்பேட்டை நியூ காலனி, 2-வது பிரதான சாலையில் கோட்டையா சக தூய்மை பணியாளர்களான ஆதிகேசவன் (45) உள்ளிட்டோருடன் சேர்ந்து குப்பைகளை சேகரித்து வாகனத்தில் ஏற்றிக்கொண்டு இருந்தார்.

அப்போது குப்பையில் இருந்த பிளாஸ்டிக் பைகளை தரம் பிரிப்பது தொடர்பாக கோட்டையா, ஆதிகேசவன் இருவருக்கும் வாய்த்தகராறு ஏற்பட்டது. இருவரும் ஒருவரை ஒருவர் தகாத வார்த்தைகளால் திட்டிக்கொண்டனர். இதில் ஆத்திரமடைந்த ஆதிகேசவன், தான் மறைத்து வைத்திருந்த சிறிய கத்தியால் கோட்டையாவின் இடதுபக்க முதுகில் குத்திவிட்டு தப்பி ஓடிவிட்டார்.