திருச்சி கிழக்கு சட்டமன்ற தொகுதியில் அம்மா மக்கள் முன்னேற்ற கழக வேட்பாளராக அக்கட்சியின் மாநில பொருளாளரும், முன்னாள் அரசு தலைமை கொறடாவுமான ஆர். மனோகரன் போட்டியிடுகிறார். இவர் நேற்று மாலை திருச்சி மேலப்புலிவார்டு சாலை வன்னி மரத்தடி பகுதியில் இருந்து தனது பிரசாரத்தை தொடங்கினார்.

அங்குள்ள வீர சூர மாகாளியம்மன் கோவிலில் சாமி தரிசனம் செய்துவிட்டு வீடு, வீடாக பொதுமக்களை சந்தித்தும், கடை, கடையாக வியாபாரிகளை சந்தித்தும் வாக்கு சேகரித்தார். அப்போது வாக்காளர் மத்தியில் அவர் பேசியதாவது, கடந்த 2011 முதல் 2016 வரை இந்த தொகுதியில் என்னை சட்டமன்ற உறுப்பினராக தேர்ந்தெடுத்த வாக்காள பெருமக்களுக்கு இப்போது மீண்டும் ஒருமுறை நன்றி தெரிவித்துக்கொள்கிறேன். நான் அரசு தலைமை கொறடாவாக பணியாற்றியபோது மக்களின் தேவை அறிந்து அடிப்படை வசதிகளை நிறைவேற்றி கொடுத்தேன். ஆனால் கடந்த 5 ஆண்டு காலமாக இந்த தொகுதியில் நான் செய்த பணிகளை அறுவடை செய்த அமைச்சர் வெல்லமண்டி நடராஜன் மக்களை சந்திக்கவே இல்லை.