புதுடெல்லி,
மத்திய சுகாதாரத்துறை செயலாளர் ராஜேஷ் பூஷன், அனைத்து மாநில சுகாதாரத்துறை முதன்மை செயலாளர்களுக்கு எழுதியுள்ள கடிதத்தில், இதுவரை 15 வயது முதல் 18 வயது வரையிலான 4 கோடியே 66 லட்சம் சிறார்களுக்கு தடுப்பூசி செலுத்தப்பட்டுள்ளதாக தெரிவித்துள்ளார்.
18 வயதுக்கு கீழ் உள்ளவர்களுக்கு கோவேக்சின் தடுப்பூசி மட்டுமே செலுத்த வேண்டும் என மத்திய சுகாதாரத்துறை அறிவுறுத்தியுள்ளது. கோவேக்சின் முதல் டோஸ் தடுப்பூசியை செலுத்திக் கொண்ட 28 நாட்களுக்குப் பிறகு, அதன் 2-வது டோஸ் தடுப்பூசியை செலுத்திக் கொள்ள வேண்டும்.
அந்த வகையில் ஜனவரி 3 ஆம் தேதி தடுப்பூசி செலுத்திக் கொண்ட 42 லட்சம் சிறார்கள ஜனவரி 31 ஆம் தேதி 2-வது டோஸ் தடுப்பூசியை செலுத்திக் கொள்ள வேண்டும். இதில் தடுப்பூசி செலுத்திக் கொள்ளாமல் நிலுவையில் உள்ள பயனாளிகள் அனைவரும் குறித்த நேரத்தில் 2-வது டோஸ் தடுப்பூசி செலுத்துவதை துரிதப்படுத்தும்படி மாநில அரசுகளுக்கு மத்திய சுகாதாரத்துறை அறிவுறுத்தியுள்ளது.