புதுடெல்லி
ஈரானில் கொரோனா வைரஸ் தாக்குதல் கடுமையாக உள்ளது. எனவே ஈரானில் உள்ள இந்தியர்களை மீட்க வேண்டும் என்று மத்திய அரசுக்குக் கோரிக்கை விடுக்கப்பட்டது. இதனைத் தொடர்ந்து முதல்கட்டமாக 58 இந்தியர்களும், 2-வது கட்டமாக 44 இந்திய யாத்திரிகர்களும் முறையே கடந்த செவ்வாய்க்கிழமை மற்றும் வெள்ளிக்கிழமை இந்தியாவுக்கு அழைத்து வரப்பட்டனர்.
பின்னர் 3-வது கட்டமாக நேற்று முன் தினம் 230 இந்தியர்கள் ஈரானிலிருந்து தாயகம் அழைத்து வரப்பட்டனர். அவர்கள் அனைவரும் ஜெய்சல்மரில் உள்ள தனிமைப்படுத்தப்பட்ட முகாமில் கண்காணிப்பில் வைக்கப்பட்டுள்ளனர்.
இந்த நிலையில், 4-வது கட்டமாக 52 இந்திய மாணவர்கள் 1 ஆசிரியர் உள்பட 53 இந்தியர்கள், ஈரானின் தெஹ்ரான் மற்றும் ஷிராஸ் நகரிலிருந்து தாயகம் அழைத்து வரப்பட்டனர். அதிகாலை 3 மணிக்கு ஏர் இந்தியா விமானம் மூலம் இந்தியா வந்த அவர்கள் ராஜஸ்தான் மாநிலம் ஜெய்சல்மாருக்கு அழைத்துச்செல்லப்பட்டுள்ளனர். ஈரானிலிருந்து 389 இந்தியர்கள் இதுவரை மீட்கப்பட்டுள்ளனர்.
ஈரானில் கொரோனா வைரஸ் பாதிப்பால் தற்போது வரை 700-க்கும் மேற்பட்டோர் உயிரிழந்துள்ளனர். 14 ஆயிரத்திற்கும் மேற்பட்டோர் கொரோனா வைரசால் பாதிக்கப்பட்டுள்ளனர்.