புதுச்சேரி, கேரளம், அசாமில் சட்டசபை தேர்தல்: வேட்பு மனுதாக்கலுக்கு இன்று கடைசி நாள்

புதுடெல்லி,

அசாம், கேரளம் ஆகிய மாநிலங்களிலும், புதுச்சேரி யூனியன் பிரதேசத்திலும் ஏப்ரல் 9-ந்தேதி தேர்தல் நடக்கிறது. இதற்கான வேட்பு மனுதாக்கல் கடந்த 16-ந்தேதி தொடங்கியது. 30 தொகுதிகள் கொண்ட புதுச்சேரியில் கடந்த 18-ந்தேதி 12 பேரும், 19-ந்தேதி 5 பேரும் மனுதாக்கல் செய்தனர். 20-ந்தேதியன்று ஒரே நாளில் 114 வேட்பு மனுக்கள் தாக்கல் செய்யப்பட்டன.

இதில் முதல்-அமைச்சர் ரங்கசாமி மங்கலம், தட்டாஞ்சாவடி என 2 தொகுதிகளில் போட்டியிட வேட்பு மனுதாக்கல் செய்தார். இதுதவிர பா.ஜனதா காங்கிரஸ், தி.மு.க. உள்ளிட்ட கட்சிகளை சேர்ந்தவர்களும் மனுதாக்கல் செய்தனர். இதுவரை 135 வேட்பு மனுக்கள் தாக்கல் செய்யப்பட்டுள்ளன.

வேட்பு மனுதாக்கல் செய்ய இன்று (திங்கட்கிழமை) கடைசி நாள் ஆகும். காங்கிரஸ்-தி.மு.க. இடையே இன்னும் தொகுதி பங்கீடு முடியாத நிலையில் இன்றுக்குள் ஏதாவது முடிவு தெரிந்துவிடும். எனவே அந்த கட்சிகள் சார்பில் போட்டியிடுபவர்கள் இன்று மனு தாக்கல் செய்வார்கள். இதேபோல் பா.ஜனதா, என்.ஆர்.காங்கிரஸ், அ.தி.மு.க.வை சேர்ந்தவர்களும் கடைசி நாளான இன்று மனுதாக்கல் செய்கின்றனர். இதனால் தேர்தல் அலுவலகங்கள் இன்று களைகட்டும்.