மராட்டிய மாநிலத்தில் உள்ள அவுரங்காபாத் மற்றும் ஒஸ்மானாபாத் ஆகிய நகரங்களின் பெயர்களை மாற்ற முந்தைய மகா விகாஸ் அதாடி அரசு முடிவு செய்தது. கடந்த 2022-ம் ஆண்டு ஜூன் 29-ந்தேதி அப்போதைய மராட்டிய முதல்-மந்திரி உத்தவ் தாக்கரே தனது பதவியை ராஜினாமா செய்வதற்கு முன்பாக, அவரது தலைமையில் நடந்த கடைசி அமைச்சரவைக் கூட்டத்தில் இந்த முடிவு எடுக்கப்பட்டது.

இதனைத் தொடர்ந்து உத்தவ் தாக்கரேவின் ராஜினாமாவுக்கு பின்னர் ஏக்நாத் ஷிண்டே தலைமையிலான சிவசேனா- பா.ஜ.க. அரசு பதவியேற்றது. இந்நிலையில் கடந்த ஜூலை மாதம் அவுரங்காபாத் மற்றும் ஒஸ்மானாபாத்தின் பெயர்களை முறையே சத்ரபதி சம்பாஜிநகர், தாராஷிவ் என மாற்ற ஏக்நாத் ஷிண்டே தலைமையிலான அரசின் அமைச்சரவை ஒப்புதல் அளித்தது.