கர்நாடக முதல்-மந்திரியாக டி.கே.சிவக்குமார் இன்று மாலை பதவியேற்பு

கார்கே- ராகுல் காந்தி பங்கேற்பு

இந்த பதவி ஏற்பு விழாவில் அகில இந்திய காங்கிரஸ் தலைவர் மல்லிகார்ஜுன கார்கே. ராகுல்காந்தி, பிரியங்கா காந்தி உள்ளிட்ட தலைவர்கள் கலந்து கொள்வார்கள் என்று கூறப்படுகிறது. அது மட்டுமின்றி முதல்-மந்திரி சித்தராமையா உள்ளிட்ட மாநில காங்கிரஸ் மூத்த தலைவர்களும் கலந்து கொள்ள உள்ளனர்.

புதிய மந்திரிகள்

இதற்கிடையே புதிய மந்திரிகளின் பெயர்களை இறுதி செய்வதற்காக சித்தராமையா, டி.கே.சிவக்குமார் ஆகியோர் நேற்று முன்தினம் டெல்லி சென்றனர். அங்கு கட்சியின் பொதுச் செயலாளர் கே.சி.வேணுகோபால், மேலிட பொறுப்பாளர் ரன்தீப்சிங் சுர்ஜேவாலா உள்ளிட்டோரை நேரில் சந்தித்து யார்-யாருக்கு மந்திரி பதவி வழங்குவது என்பது குறித்து ஆலோசனை நடத்தினர். தொடர்ந்து 2-வது நாளான நேற்று டெல்லியில் அகில இந்திய காங்கிரஸ் தலைவர் மல்லிகார்ஜுன கார்கே,மக்களவை எதிர்க்கட்சி தலைவர் ராகுல்காந்தி ஆகியோரை சித்தராமையா, டி.கே.சிவக்குமார் நேரில் சந்தித்து பேசினர்.

இளம் தலைமுறை எம்.எல்.ஏ.க்கள்

சித்தராமையா தனது பரிந்துரைகள் அடங்கிய பெயர் பட்டியலையும். டி.கே.சிவக்குமார் தான் விரும்பும் மந்திரிகளின் பெயர் பட்டியலையும் வழங்கினர். இருவரின் பெயர் பட்டியலையும் ஆய்வு செய்த ராகுல்காந்தி, முதல்கட்டமாக 14 பேர் மந்திரிகளாக பதவி ஏற்க அனுமதி அளித்துள்ளதாக கூறப்படுகிறது.

மந்திரிசபையில் 40 வயதுக்கு உட்பட்ட இளம் தலைமுறை எம்.எல்.ஏ.க்களுக்கு 10 இடங்களும், 40 வயதுக்கு மேற்பட்ட மூத்த எம்.எல்.ஏ.க்களுக்கு 23 இடங்களும் வழங்க காங்கிரஸ் மேலிடம் தீர்மானித்து உள்ளதாக கூறப்படுகிறது.

இந்த மந்திரி பட்டியலை இறுதி செய்து இன்று (புதன்கிழமை) காலை 10 மணி அளவில் கவர்னர் மாளிகைக்கு டி.கே.சிவக்குமார் அனுப்பி ஒப்புதல் பெறுவார் என்றும், அதன்படி மாலை நடைபெறும் பதவி ஏற்பு விழாவில் டி.கே.சிவக்குமார் முதல்-மந்திரியாகவும், 14 பேர் மந்திரிகளாகவும் பதவி ஏற்க உள்ளனர் என்பது குறிப்பிடத்தக்கது.