3 பாயிண்ட் சீட் பெல்ட், 2 பாயிண்ட் சீட் பெல்ட்டை விட பாதுகாப்பானது. ஏனென்றால் இதை அணிகிறபோது உடலை முழுமையாக அசையாமல் பெல்ட் பிடித்துக்கொள்ளும். தோளையும் இறுக்கி பிடித்துக்கொள்ளும். இதனால் விபத்து ஏற்பட்டாலும் படுகாயம் தவிர்க்கப்படும். பயணி தூக்கி வீசப்பட மாட்டார்.

அந்த 3 பாயிண்ட் பெல்ட் வசதியை காரில் ஏற்படுத்துவதை கட்டாயம் ஆக்கும் அறிவிப்பை மத்திய போக்குவரத்து மந்திரி நிதின் கட்காரி, டெல்லியில் நேற்று நிருபர்களிடம் வெளியிட்டார்.

இதுபற்றி அவர் கூறுகையில், காரில் முன்பக்கம் பார்த்து பயணிக்கிற அனைத்து பயணிகளுக்கும் 3 பாயிண்ட் சீட் பெல்ட்டுகளை வாகன உற்பத்தியாளர்கள் வழங்குவதை கட்டாயம் ஆக்கும் கோப்பில் கையெழுத்து போட்டுள்ளேன் என குறிப்பிட்டார். இந்த புதிய விதி எப்போது அமலுக்கு வரும் என்பதை மந்திரி நிதின் கட்காரி குறிப்பிடவில்லை.