சுதந்திர தினம்: ‘வீடுகளில் தேசியக் கொடியை ஏற்றுங்கள்’ - பொதுமக்களுக்கு பிரதமர் மோடி அழைப்பு

'வந்தே மாதரம்'

இதுதொடர்பாக தனது'எக்ஸ்' வலை தளத்தில் கருத்து தெரிவித்த பிரதமர் மோடி, "நமது மூவர்ணக் கொடி நமது பெருமை; நாட்டிற்காக எப்போதும் நமது சிறந்த பங்களிப்பை வழங்க அது நமக்குத் தொடர்ந்து ஊக்கமளிக்கும் ஒரு சக்தியாகத் திகழ்கிறது" என்று கூறியிருந்தார்.

மேலும் இந்த ஆண்டின் கருப்பொருள் தேசியப் பாடலான 'வந்தே மாதரம்' என்பதை சுட்டிக்காட்டிய பிரதமர், 'ஹர் கர் திரங்கா' இயக்கத்தில் உற்சாகத்துடன் பங்கேற்போம்; 'விக்சித் பாரத்'தை (வளர்ந்த இந்தியாவை) உருவாக்குவதில் பங்களிக்க நமது கூட்டு உறுதிப்பாட்டைப் புதுப்பிப்போம். இந்த ஆண்டுக்கான முயற்சிகள் 'வந்தே மாதரம்' பாடலுக்கு அர்ப்பணிக்கப்பட்டிருப்பதிலும், அதுவும் அப்பாடலின் 150-வது ஆண்டு நிறைவைக் கொண்டாடும் வேளையில் இது அமைந்திருப்பதிலும் மகிழ்ச்சி அடைகிறேன் என்றும் பிரதமர் குறிப்பிட்டார்.

முன்னதாக இந்தியாவின் சுதந்திரத்தைக் கொண்டாடும் நிகழ்வுகளின் ஒரு பகுதியாக, பொதுமக்கள் தேசியக் கொடியைத் தங்கள் வீடுகளுக்குக் கொண்டு வந்து ஏற்றும் வகையில் ஊக்குவிப்பதற்காக 'ஆசாதி கா அம்ரித் மஹோத்சவ்' (சுதந்திரத்தின் அமிர்தப் பெருவிழா) திட்டத்தின் கீழ் 'ஹர் கர் திரங்கா' இயக்கம் தொடங்கப்பட்டது.