பிரேசிலியா
பிரேசில் அதிபராக லூலா டா சில்வா 4-வது முறையாக வெற்றி பெற்றதற்கு பிரதமர் மோடி வாழ்த்து தெரிவித்து உள்ளார்.
பிரேசில் நாட்டின் அதிபராக லூயிஸ் இனாசியோ லூலா டா சில்வா இருந்து வரும் நிலையில், நாட்டில் புதிய அதிபரை தேர்ந்தெடுப்பதற்கான தேர்தல் நடந்தது.
இந்த தேர்தலில், அதிபர் சில்வாவுக்கும், முன்னாள் அதிபர் ஜெய்ர் போல்சோனாரோவின் மூத்த மகன் மற்றும் வலதுசாரி எம்.பி.யான பிளாவியோ போல்சோனாரோவுக்கும் இடையே கடும் போட்டி நிலவியது. முதலில் கடந்த 4-ந்தேதி நடந்த தேர்தலில் 50 சதவீதத்திற்கும் கூடுதலான வாக்குகளை யாரும் பெறாத நிலையில், மீண்டும் தேர்தல் நடத்த முடிவானது.
இதன்படி, நேற்று முன்தினம் வாக்குப்பதிவு விறுவிறுப்பாக நடந்து முடிந்தது. இந்த தேர்தலின் முடிவுகள் இந்திய நேரப்படி நேற்று காலை வெளியிடப்பட்டன.
முதல் சுற்று முடிவில், போல்சோனாரோ 47 சதவீத வாக்குகளுடன் முன்னிலை பெற்றார். லூலா 45 சதவீத வாக்குகளுடன் 2-வது இடத்திற்கு தள்ளப்பட்டார். இதனால், போல்சோனாரோவே வெற்றி பெறுவார் என எதிர்பார்க்கப்பட்டது. கணிப்புகளும் அதனையே தெரிவித்து இருந்தன.
ஏனெனில், அந்நாட்டில் 1980-ம் ஆண்டுக்கு பின்னர், முதல் சுற்று முடிவில் தோல்வியை தழுவியவர் வெற்றி பெற்றதில்லை. ஆனால் இதனை முறியடித்து சில்வா இறுதி சுற்று முடிவில் 51.7 சதவீத வாக்குகளை பெற்று அதிரடியாக வெற்றி பெற்றார். 48.2 சதவீத வாக்குகளுடன் போல்சோனாரோ பின்னுக்கு தள்ளப்பட்டு தோல்வியை தழுவினார். இதனால் சில்வா, 4-வது முறையாக அதிபராகியுள்ளார்.
இதனை தொடர்ந்து, அவருடைய தொழிலாளர் கட்சிக்கான சிவப்பு வண்ணத்தில் ஆடைகளை அணிந்து ஆயிரக்கணக்கான மக்கள் ரியோ டி ஜெனீரோவின் தெருக்களில் திரண்டனர். அவருடைய ஆதரவாளர்களில் பலர் ஆனந்த கண்ணீர் வடித்து, மகிழ்ச்சிக்கான கொண்டாட்டத்தில் பங்கேற்றனர்.
இறுதிக்கட்ட தேர்தல் பிரசாரத்தின்போது, விலைவாசி உயர்வு தொடர்பான விவகாரங்கள் பற்றி சில்வா பேசினார். வாக்காளர்கள் அதிக அளவில் திரண்டு வந்து வாக்குப்பதிவு செய்ய வேண்டும் என்றும் அப்போது வலியுறுத்தினார். இதனால், அதிக அளவில் பதிவான வாக்குகள் அவருக்கான ஆதரவை வெளிப்படுத்தி உள்ளன.
இந்த வரலாற்று சாதனை வெற்றியை பெற்று, மீண்டும் அதிபராக தேர்ந்தெடுக்கப்பட்டுள்ள லூலா டா சில்வாவிற்கு பிரதமர் மோடி தனது வாழ்த்துகளை தெரிவித்து கொண்டார். இதுகுறித்து எக்ஸ் பக்கத்தில் பதிவிட்டுள்ள பிரதமர் மோடி, எனது அன்பான நண்பர் அதிபர் லூலாவின் இந்த மாபெரும் வெற்றிக்கு மனமார்ந்த வாழ்த்துகள்.
இந்தியா மற்றும் பிரேசில் நாடுகளுக்கு இடையேயான நட்புறவை மேலும் வலுப்படுத்த அவருடன் இணைந்து பணியாற்ற ஆவலுடன் காத்திருக்கிறேன். இரு நாடுகளும் இணைந்து வளரும் நாடுகளின் குரலாக உலக அரங்கில் ஒலிக்கும் என்றார்.