புதுடெல்லி,
இந்தியாவின் அண்டை நாடுகளுடனான எல்லையில் கடந்த 5 வருடங்களில், புதிதாக கட்டமைக்கப்பட்டுள்ள சாலைகள் விவரம் குறித்து நாடாளுமன்ற மாநிலங்களவையில் எழுப்பப்பட்ட கேள்விக்கு பாதுகாப்பு துறை இணை மந்திரி அஜய் பட் எழுத்துப்பூர்வமாக பதில் அளித்தார்.
அதில் தெரிவிக்கப்பட்டுள்ளதாவது;-
நாட்டின் எல்லை சாலைகள் அமைப்பின் மூலம் கடந்த 5 வருடங்களில், இந்தியாவின் அண்டை நாடுகளுடனான எல்லையில், 3595.06 கிலோ மீட்டர் நீளத்திற்கு புதிதாக சாலைகள் அமைக்கப்பட்டுள்ளன. இதற்கான மொத்த செலவு ரூ.20767.41 கோடி ஆகும்.
அதிகபட்சமாக இந்தியா - சீனா எல்லையில் 2088 கிலோ மீட்டர் நீளத்துக்கு சாலைகள் அமைக்கப்பட்டுள்ளன. இதற்கான செலவு ரூ.15477.06 கோடி ஆகும். அதே போல, இந்தியா - பாகிஸ்தான் எல்லைப் பகுதியில் 1300 கிலோமீட்டர் நீளத்திற்கு சாலைகள் அமைக்கப்பட்டுள்ளன. இதற்கான செலவு ரூ.4242.38 கோடி ஆகும்.
இந்தியா - மியான்மர் எல்லையில், ரூ.882.52 கோடி செலவில் 150 கிலோமீட்டர் நீளத்திற்கு சாலைகள் அமைக்கப்பட்டுள்ளன. இந்திய - வங்காளதேச எல்லையில், ரூ.165.45 கோடி செலவில் 19 கிலோமீட்டர் நீளத்திற்கு சாலைகள் அமைக்கப்பட்டுள்ளன.
இவ்வாறு அதில் தெரிவிக்கப்பட்டுள்ளது.